„Maður óttast enn og aftur að það sé lengra til lands, eins og það er búið að vera í fimm ár,“ segir Konráð S. Guðjónsson hagfræðingur um nýjustu verðbólgumælingu Hagstofunnar. Eftir að verðbólga í nóvember fór niður í 3,7 prósent hefur hverja vonbrigðamælingin á fætur annarri rekið á fjörur þjóðarinnar. Flestir sérfræðingar spáðu því að verðbólgan færi niður fyrir fimm prósent í þetta skiptið og 5,2 prósent er því blaut tuska framan í hagstjórnina. Gjaldskrárhækkunum og breytingum á vörugjöldum á bifreiðar var, réttilega, kennt um verðbólguskotið í janúar. En í þetta skiptið eru hækkanirnar á breiðari grundvelli þótt eitt og annað sé fyrirsjáanlegt. Til að mynda hækkun á fatnaði og heimilistækjum þar sem útsölur eru að líða undir lok og hækkanir á gjaldskrám sveitarfélaga — sorphirðu, vatns- og fráveitu. En öllu meira áhyggjuefni er að annan mánuðinn í röð hækkar verð á mat og drykk og flugfargjöld hækka umtalsvert meira en á sama tíma í fyrra. Konráð telur að allar vonir um vaxtalækkanir í vor séu fyrir bí. Þvert á móti hljóti peningastefnunefndin að ræða í fúlustu alvöru að hækka vexti þegar hún kemur næst saman 18. mars. „Ef þetta heldur svona áfram og við fáum fjórðu eða fimmtu mælinguna í röð, sem er mjög óheppileg, og undirliggjandi verðbólguþrýstingur er að aukast þá allavega verður nefndin tilneydd til að hækka vexti í maí. Nema að það verði einhver veruleg kólnun í hagkerfinu á sama tíma.” Við sem þjóð verðum að hætta að tala um einskiptisliði Konráð rifjar upp að í hálfan áratug hafi verið talað um að það sé alveg að takast að ná niður verðbólgu. Talað sé um að það sjái til lands en alltaf komi bakslag. Í fyrstu hafi húsnæðismarkaði verið kennt um en undanfarið hafi hækkanir ítrekað verið skýrðar með einskiptisliðum. En málið með einskiptisliðina er að þeir eru margir og alltaf til hækkunar. „Við sem þjóð og við sem erum að velta fyrir okkur verðbólgunni ættum að hætta að tala um einstaka liði í samhengi við verðbólgu. Hver verðhækkun kemur bara einu sinni, hún kemur í stökkum og skrefum. Núna virðist til dæmis húsnæðisliðurinn vera að kólna töluvert sem er að hjálpa. Við erum líka heppin með að verðbólgan sem er að koma utan frá er mjög lítil. Þetta eru allt saman innlendir kraftar sem eru þarna að verki og það er bara misjafnt hvaðan hún kemur. Hvort sem það eru einskiptisliðir eða hvað það kallast. Verðbólgan er alltof mikil, hún er langt frá 2,5 prósenta verðbólgumarkmiði Seðlabankans og er að færast fjær því. Það er bara eitthvað sem er ekki hægt að hunsa með einskiptisliðum.“