Starfshópur um strandsiglingar, sem afhenti innviðaráðherra í gær skýrslu, leggur til að öll kolefnisgjöld af reglubundnum strandsiglingum verði lögð af þar til komnar eru raunhæfar lausnir til orkuskipta í siglingum stærri skipa. „Nýtt fyrirkomulag endurgreiðslu hluta kolefnisgjalda dugir að mati starfshópsins ekki til að efla strandsiglingar,“ segir í tilkynningu ráðuneytisins. Þá leggur starfshópurinn til að stjórnvöld beiti sér fyrir því að skip í reglubundnum strandsiglingum hér við land verði utan ETS kerfisins með sama hætti og innanlandsflug er utan þess. Innviðaráðuneytið segir að tillögur hópsins, sem var skipaður í ágúst 2025, verði teknar til skoðunar. Í hópnum sátu m.a. fulltrúar SVÞ, SA, Vegagerðarinnar og Samgöngustofu. Hópnum var m.a. ætlað að vinna áfram með skýrslu sem Vegagerðin gerði fyrir innviðaráðuneytið og skilaði í desember 2024. Í skýrslunni segir að vöruflutningar hafi þróast þannig frá síðustu aldamótum að landflutningar hafi að verulegu leyti tekið við af strandflutningum en aðeins eitt félag sinni þeim nú hér á landi. „Starfshópurinn telur þær breytingar helgast m.a. af hækkun opinberra gjalda á strandsiglingar á undanförnum árum. Nauðsynlegt sé að endurskoða kolefnisálögur á strandflutningum sem í raun eru nú að vinna gegn megin markmiðum slíkra skatta en staðreyndin er að kolefnisspor strandflutninga er minna en landflutninga.“ Meðal annarra tillaga eru að vitagjöld verði felld niður af skipum sem bjóða upp á reglubundnar strandsiglingar, hafnayfirvöld leysi skip sem eru í reglubundnum strandsiglingum frá hafnsöguskyldu og gjaldakafli hafnalaga verði endurskoðaður. 180 milljarða króna innviðaskuld í vegakerfinu Starfshópurinn telur heildstæða nálgun mikilvæga til að draga úr vexti landflutninga með stefnumótun, efnahagslegum hvötum og endurskoðun á skipulagi flutningakerfisins. Langstærsti hluti vöruflutninga hér á landi fari nú fram með stórum bifreiðum um þjóðvegi. Verði ekkert að gert blasi við að landflutningar haldi áfram að aukast og álag á vegakerfið og kostnaður við það vaxi umtalsvert á næstu árum. Í skýrslunni kemur fram að vegagerðin telji að innviðaskuld í þjóðvegakerfinu nemi um 180 milljörðum króna og að hún eigi að verulegu leyti rætur að rekja til þungaflutninga á vegum landsins.