Utanríkisráðherra segir ekki beint eftirsjá eftir af stjórnarháttum klerkastjórnarinnar í Íran. Hún hefur áhyggjur af enn frekari stigmögnun átakanna. Íslendingar verið skýr og leiðandi rödd í baráttunni fyrir mannréttindum Þorgerður Katrín Gunnarsdóttir, utanríkisráðherra, segir klerkastjórnina í Íran hafa með framgöngu sinni stuðlað að miklum ófriði og öfgum í heimshlutanum. Hún var í viðtali í hádegisfréttum. „Þetta hefur verið uppeldisstöð fyrir hryðjuverkahópa svo ekki sé talað um þetta víðtæka ofbeldi sem klerkastjórnin og Khamenei hefur beitt sína eigin borgara og drepið tugi þúsunda. Þannig að það er ekki beint eftirsjá eftir þessum stjórnarháttum eða fyrir hvað þessi stjórn hefur staðið.“ Hún hefur áhyggjur af þeirri hættu að þessi átök stigmagnist enn frekar sem og stigmögnun átaka almennt. Hún tekur undir málflutning framkvæmdastjóra Sameinuðu þjóðanna sem lýsti því yfir á fundi öryggisráðs SÞ í gær að þetta væri alvarleg ógn gegn friði og öryggi á heimsvísu. Þorgerður Katrín segir mikilvægt að alþjóðalög og stofnsáttmáli SÞ séu virtir og að unnið sé að friði. „Um leið vil ég undirstrika það að meðal annars við Íslendingar. Við höfum verið mjög skýr og leiðandi rödd í baráttunni fyrir mannréttindum í Íran og haft frumkvæði að því meðal annars á vettvangi mannréttindaráðs Sameinuðu þjóðanna að samþykkja harðorða ályktun á aukafundi sem við báðum um bara núna um daginn. Þannig að afstaða okkar gagnvart klerkastjórninni er alveg skýr en auðvitað er það þannig að maður hefur áhyggjur af stigmögnun átaka.“ Í nánu sambandi við Norðurlöndin vegna Íslendinga í heimshlutanum Íslendingar í Mið-Austurlöndum komast hvorki lönd né strönd. Þorgerður Katrín segir ráðuneytið og borgaraþjónustuna hafa tekið á móti mörgum ábendingum um Íslendinga sem eru staddir á þessu svæði. „Við höfum verið að gera eins og við getum, að veita fólki upplýsingar og aðstoð. Við erum í mjög nánu samstarfi við Norðurlöndin um þetta, sem hafa sendiráð á svæðinu, en við teljum líka brýnt að fólk hugsi um það að virða tilmæli viðkomandi stjórnvalda og fylgjast líka með staðbundnum fjölmiðlum. En við munum gera það sem við getum.“ Hún segist ekki hafa rætt formlega við kollega sína í nágrannalöndunum um stöðuna en hefur átt í óformlegum samskiptum við þá. „Það sem skiptir máli fyrir okkur, upp á okkar borgara, er að geta verið í samskiptum við Norðurlöndin sem hafa sendiráð, hafa fulltrúa, hafa tengiliði á þessi svæði.“ Ef aðstoðar sé þörf er hægt að hafa samband við neyðarnúmer borgaraþjónustunnar +354 545-0112 eða senda tölvupóst á netfangið hjalp@utn.is.