Sviss­nesk stjórn­völd hafa samþykkt að greiða eina, sértæka fjár­hæð upp á 50 þúsund sviss­neska franka, til fórnar­lamba og aðstand­enda þeirra sem létust í hinum mannskæða nætur­klúbbs­bruna í Crans-Montana á nýárs­dag. Greiðslan nemur um 8 milljónum ís­lenskra króna á gengi dagsins og á að ná til hvers ein­stak­lings sem lést eða var lagður inn á sjúkra­hús eftir brunann, sam­kvæmt upp­lýsingum stjórn­valda. Bruninn braust út skömmu eftir miðnætti 1. janúar í kjallara skemmtistaðarins Le Constella­tion og létust 41 manns, auk þess sem yfir hundrað slösuðust al­var­lega. Sviss­neska sam­bands­ráðið hyggst flýta bráða­birgðalöggjöf til að greiðslurnar geti farið fram. Ráðherrar sögðu að hefðbundnar leiðir, tryggingar og bætur á vegum kantónanna, endur­spegluðu ekki nægi­lega um­fang hör­munganna og því stigi al­ríkið nú inn með beinum hætti. Greiðslurnar eiga að vera óháðar niður­stöðu saka- eða einkamála­rannsókna og fela ekki í sér af­stöðu til þess hver beri ábyrgð. Þær eru settar fram sem sam­stöðu­fram­lag en ekki niður­staða um bóta­skyldu. Leit að sáttum utan dóms Sam­hliða þessu hyggjast stjórn­völd boða til samráðs­fundar með þátt­töku fórnar­lamba, tryggingafélaga og yfir­valda til að reyna að greiða fyrir sáttum utan dóms og draga úr líkum á löngum og kostnaðarsömum dóms­málum. Sviss hefur jafn­framt gefið til kynna að ríkið geti lagt til allt að 20 milljónir franka til slíkra sátta. Sam­svarar það um 3,1 milljarði ís­lenskra króna. Rannsókn á orsökum brunans stendur enn yfir. Vitni og saksóknarar hafa bent á að eldurinn kunni að hafa kviknað innan­dyra þegar flug­eldar eða neista­kerti kveiktu í mjög eld­fimum hljóðein­angrunar­efnum í lofti kjallarans