Í janúar og febrúar voru nýskráðir alls 2.200 nýir fólksbílar sem jafngildir 76% aukningu miðað við sama tímabil í fyrra, samkvæmt greiningu Bílgreinasambandsins. „Aukningin milli ára er að stórum hluta drifin áfram af ökutækjaleigum. Þá benda tölur um innflutning til þess að hluti nýskráðra fólksbíla það sem af er ári hafi verið fluttur inn fyrir áramót en þá tóku gildi umtalsverðar breytingar á vörugjaldi á ökutæki.“ Einstaklingar nýskráðu samanlagt 534 nýja fólksbíla á fyrstu tveimur mánuðum ársins, sem samsvarar 15% samdrætti samanborið við sama tímabil í fyrra. Algengasti orkugjafinn var rafmagn með 61% hlutdeild og þar á eftir komu tengiltvinnbílar með 26% hlutdeild. Ökutækjaleigur voru helsti drifkrafturinn á bak við aukna nýskráningu það sem af er ári. Samanlagt voru nýskráðir 1.423 nýir bílaleigubílar á tímabilinu sem er 223% aukning frá sama tímabili í fyrra þegar nýir bílaleigubílar voru 440. „Aukningin er að mestu leyti tímasetningaráhrif vegna breytinga á vörugjaldi um áramótin en ekki vísbending um aukna eftirspurn eftir bílaleigubílum. Að jafnaði eru janúar og febrúar fremur rólegir mánuðir í nýskráningum bílaleigubíla en stærstur hluti nýskráninga fer vanalega fram á tímabilinu apríl til júní.“ BGS birtir mynd af mánaðarlegri þróun innflutnings og nýskráninga fólksbíla frá ársbyrjun 2023. Sambandið segir að alla jafna fylgist innflutningur og nýskráningar fólksbíla nokkuð, þ.e. þegar meira er flutt inn af fólksbílum sé einnig meira nýskráð og öfugt. Það sé þó ekki algilt. „Á myndinni má sjá verulegan innflutningi í árslok 2025 en á sama tíma eru nýskráningar umtalsvert færri. Þetta snýst svo við í janúar 2026 þegar innflutningur er lítill miðað við fjölda nýskráninga sem bendir til þess að í janúar hafi verið nýskráðir fólksbílar sem voru fluttir inn í lok síðasta árs.“ Þetta sýni hvernig breytingar á skattlagningu geti skapað hvata til að flýta innflutningi jafnvel þótt nýskráningar eigi sér ekki stað nær samhliða. Heimild: Bílgreinasambandið, Hagstofa Íslands og Samgöngustofa.