Frá blaðamannafundi þar sem forystukonur ríkisstjórnarinnar kynntu áform um þjóðaratkvæðagreiðsluna.RÚV / Ragnar Visage Fyrri umræða um þingsályktunartillögu utanríkisráðherra um þjóðaratkvæðagreiðslu vegna framhalds viðræðna um aðild Íslands að Evrópusambandinu er eina málið á dagskrá fundar Alþingis í dag. Umræðan hefst að loknum óundirbúnum fyrirspurnum klukkan þrjú. Tillagan var kynnt á blaðamannafundi á föstudag þar sem fram kom að stefnt yrði að atkvæðagreiðslunni laugardaginn 29. ágúst. Búast má við fjörugum umræðum í þinginu þar sem stjórnarandstaðan hefur brugðist nokkuð hart við fyrirætlunum ríkisstjórnarinnar. Meirihluti landsmanna er hlynntur þjóðaratkvæðagreiðslunni samkvæmt niðurstöðum þjóðarpúls Gallups sem birtist fyrir helgi.