Markaðsaðilar eru byrjaðir að veðja á að nokkrir af stærstu seðlabönkum heims neyðist til að hækka stýrivexti vegna áhrifa stríðsins í Íran, þar á meðal verulegrar hækkunar orkuverðs. Financial Times greinir frá. Fjárfestar gera nú ráð fyrir Seðlabanki Evrópu muni hækka stýrivexti sína einu sinni eða tvisvar í ár þar sem hækkandi olíu- og gasverð hefur aukið verðbólguþrýsting. Jafnframt gefur verðlagning á afleiðumörkuðum til kynna að Englandsbanki, seðlabanki Bretlands, gæti hækkað vexti fyrir lok þessa árs. Til samanburðar hafði bankinn áður gefið til kynna að hann hygðist lækka vexti frekar. Sjá einnig Hækkun olíu- og gas­verðs gæti kallað á vaxta­hækkun Fjárfestar eru einnig byrjaðir að draga úr væntingum um frekari vaxtalækkanir hjá Seðlabanka Bandaríkjanna. Þeir gera nú aðeins ráð fyrir einni eða tveimur 25 punkta lækkunum, en til samanburðar voru væntingar um 2-3 slíkar lækkanir áður stríðsátökin hófust. Væntingarnar eru sagðar endurspegla því að margir hafi dregið lærdóm af verðbólguskotinu sem fylgdi innrás Rússlands í Úkraínu árið 2022, þegar flestir seðlabankar voru taldir hafa brugðist allt of seint við hækkandi verðlagi. Sjá einnig Olían yfir 100 dali og órói á mörkuðum Einn greinandi sem FT ræddi við segir að skuldabréfamarkaðurinn hafi vaknað við þær fregnir í morgun að mögulega muni olíuverð ekki aðeins fara upp í 100 dali á tunnu heldur gæti það jafnframt hækkað upp í 150 dali eða jafnvel 200 dali.