Útflutningstekjur tækni- og hugverkaiðnaðar námu 369 milljörðum króna á síðasta ári, samkvæmt nýrri greiningu Samtaka iðnaðarins (SI) sem var birt í síðustu viku. Það samsvarar 18% af heildarútflutningstekjum hagkerfisins. Sigríður Mogensen, sem tók við starfi sviðsstjóra hugverkasviðs SI árið 2017, segir að ævintýralegur vöxtur og árangur í tækni- og hugverkaiðnaði á síðustu árum sé ekki tilviljun. „Ef við viljum sjá áframhald á vextinum þarf að styrkja kerfi skattahvata vegna rannsókna- og þróunar en kerfið hefur ekki virkað sem skildi á síðustu misserum,“ segir Sigríður í viðtali í tilefni af Iðnþingi sem fór fram í síðustu viku. „Við erum að keppa við önnur lönd um þessi framúrskarandi fyrirtæki og fjárfestingar og það er hægt að staðsetja störf af þessum toga nánast hvar sem er.“ Sigríður segir SI binda vonir við að með nýrri atvinnustefnu sýni stjórnvöld að þau vilji sjá þessi fyrirtæki vaxa hér á landi og búa til verðmæti fyrir land og þjóð. Það þurfi að sýna það í verki. „Við þurfum sem samfélag og þjóð að ákveða að við viljum byggja upp alþjóðlega framúrskarandi fyrirtæki. Þetta gerist ekki af sjálfu sér. Það þarf að búa til starfsumhverfi sem er fyrirsjáanlegt til margra ára, fyrirtæki gera áætlanir um fjárfestingar mörg ár fram í tímann og það gengur ekki að vera með tímabundnar ívilnanir sem eru háðar vindum hverju sinni. Það mikilvægasta sem ríkisstjórnin getur gert fyrir verðmætasköpun á Íslandi og þar með hag ríkissjóðs er að tryggja stöðugt og fyrirsjáanlegt starfsumhverfi sem stenst alþjóðlega samkeppni.“ Hún segir að í tækni- og hugverkaiðnað verði til varanleg verðmæti fyrir hagkerfið, greinin skapi háframleiðnistörf. Gríðarlegu máli skipti því fyrir íslenskt efnahagslíf að styðja áfram við vöxt hugverkaiðnaðar. „Nýlega var tilkynnt um væntanlega 40 milljarða króna skattgreiðslu vegna sölu Kerecis. Það munar heldur betur um minna fyrir íslenskt samfélag.“ Spurð um aðra þætti sem geti stutt við hugverkaiðnaðinn nefnir Sigríður m.a. að SI hafi lengi haft áhyggjur af stöðu STEAM-greina á Íslandi. Hún telur því að breyta þurfi um áherslur þannig að menntakerfið mæti betur nútímakröfum. Fréttin er hluti af viðtali við Sigríði í sérblaðinu Iðnþing 2026 sem fylgdi Viðskiptablaðinu sem kom út í síðustu viku.