Þrjú flutninga­skip hafa orðið fyrir árásum í Hor­mússundi á síðustu klukku­stundum, að því er fram kemur í um­fjöllun The Telegraph. Bret­land rekur sér­staka eftir­lits­einingu fyrir siglingar á svæðinu, UK Maritime Tra­de Operations (UKMTO), sem segir taí­lenska skipið Mayuree Naree hafa orðið fyrir skoti og skemmst um 11 sjómílur norðan við Óman. Sam­kvæmt taí­lenskum yfir­völdum var 20 sjómönnum bjargað en þriggja er enn saknað. Annað skip, Star Gwyneth undir fána Mars­hall-eyja, varð fyrir skoti um 50 mílur norðvestur af Dúbaí. Skipið hlaut skemmdir á skrokki en engin meiðsli urðu á áhöfn. Þriðja skipið, gáma­flutninga­skip undir japönskum fána, varð fyrir minni háttar skemmdum nærri Sam­einuðu arabísku fursta­dæmunum. Óljóst er hver stóð að baki árásunum eða hvort um hafi verið að ræða dróna eða eld­flaugar. Íran hefur þó lýst því yfir að það ráði yfir siglinga­leiðinni og hótað að ráðast á skip sem fara þar um, en Hor­mússund er ein mikilvægasta flutninga­leið heims fyrir olíu. Telegraph segir að olíu­verð hafi sveiflast skarpt í kjölfar árásanna og að Alþjóð­lega orku­stofnunin (IEA) hafi sam­kvæmt fréttum lagt til stærstu losun neyðarolíu­birgða frá upp­hafi. Bandaríkin sögðu jafn­framt að þau hefðu eyðilagt 16 báta, sam­hliða fregnum um að írönsk yfir­völd hefðu hafið lagningu sjómina í sundinu. Pete Heg­seth, varnar­málaráðherra Bandaríkjanna, sagði árásirnar hluta af „hörðustu“ að­gerðum gegn Íran frá því stríðið hófst 28. febrúar. [Update] Thai navy officially confirms attack on cargo ship near Strait of Hormuz The Royal Thai Navy (RTN) has officially confirmed that a Thai-flagged cargo vessel was attacked while sailing near the Strait of Hormuz, and said efforts are underway to assist the ship’s 23 crew… pic.twitter.com/8DtYO7dgb7 — Thai Enquirer (@ThaiEnquirer) March 11, 2026