Stjórn Sýnar hefur tekið ákvörðun um að ganga til einkaviðræðna við Símann hf. á grundvelli skilmálaskjals um kaup á öllum vef- og útvarpsmiðlum félagsins. Rekstrareiningin sem um ræðir inniheldur vefmiðlana Vísi, Já.is, Innherja og Bland.is ásamt útvarpsmiðlum Bylgjunnar, Léttbylgjunnar, Gullbylgjunnar, FM957, X977 og hlaðvarpsveitunni Tal. Áætlað er að tekjur rekstrareiningarinnar nemi um 3 milljörðum króna á ársgrundvelli. Heildarvirði (e. enterprise value ) í viðskiptunum nemur samkvæmt skilmálaskjali 5.250 milljónum króna. „Samkvæmt skilmálaskjalinu skuldbinda aðilar sig til þess að vinna að því að undirrita kaupsamning á grundvelli þeirra skilmála sem þar koma fram. Viðskiptin eru háð niðurstöðum áreiðanleikakönnunar, samkomulagi um endanlegan kaupsamning, samþykki stjórna beggja aðila og samþykki viðeigandi eftirlitsaðila,“ segir í tilkynningu S‎ýnar. Eins og áður hefur komið fram hefur stjórn Sýnar haft framtíðarfyrirkomulag á rekstri fjölmiðlahluta félagsins til skoðunar. „Sala umræddra miðla er liður í stefnumótandi endurskipulagningu rekstrar Sýnar sem miðar að því að einfalda starfsemi félagsins og styrkja rekstrargrundvöll þess til framtíðar. Með því að skerpa áherslur í rekstrinum er markmiðið að tryggja áframhaldandi framúrskarandi þjónustu við einstaklinga og fyrirtæki og arðbæran rekstur til lengri tíma.“ María Björk Einarsdóttir, forstjóri Símans, segir í tilkynningu til Kauphallarinnar að vef- og útvarpsmiðlar Sýnar hafi fest sig í sessi sem ómissandi veita frétta og afþreyingar hjá meirihluta landsmanna. Sjá einnig Síminn breytir nafni sam­stæðunnar „Öflugur mannauður og sterk vörumerki miðlanna falla vel að okkar starfsemi, og við trúum því að sameinað miðlafyrirtæki undir móðurfélaginu Ásum, verði í góðri stöðu til að veita framúrskarandi fjölmiðlaþjónustu í síbreytilegu umhverfi. Með einstaklega vel heppnaðri yfirtöku á Billboard, markvissri uppbyggingu Sjónvarp Símans Premium, og hraðri framþróun auglýsingatækni innan Símans, höfum við mótað traustan grunn til að byggja upp eininguna með góðum árangri,“ segir María Björk.