Tilkynnt var í morgun að Síminn hygðist kaupa Sýn á 5,2 milljarða. Verði engar hindranir á veginum ættu þau að geta gengið í gegn á tólf mánuðum. Samkvæmt upplýsingum Spegilsins á þetta sé nokkurn aðdraganda, þreifingar hafa verið í töluverðan tíma en á síðustu mánuðum var allt sett á fullt skrið. Nýr taktur Símans eftir söluna á Mílu Kaupin eru háð öllum eðlilegum fyrirvörum en það vekur athygli að tilkynningin um fyrirhuguð kaup skuli hafa verið send út á þessum tímapunkti þegar margt er enn ófrágengið. Hvorki innan Símans né Sýnar eru áhyggjur af því að kaupin hljóti ekki blessun Samkeppniseftirlitsins enda Síminn hvorki að reka útvarpsstöðvar né frétta-vefsíðu. Síminn hefur tekið miklum breytingum á undanförnum árum; þegar félagið seldi ljósleiðarafélagið Mílu fyrir fjórum árum á tugi milljarða varð stjórnendum ljóst að þeir þyrftu að finna nýjan takt. Síminn hefur á undanförnum árum keypt félög eins og Öryggismiðstöðina, OK sem áður hét Opin Kerfi, og Noona - eitt vinsælasta bókunarkerfi landsins. Kaupin á vef-og útvarpsmiðlum Sýnar eru sögð eðlilegt framhald á fjárfestingu félagsins á þremur auglýsingafyrirtækjum sem reka biðskýli fyrir Strætó og aðra auglýsingafleti. Hugmynd sem hefur lengi legið í loftinu Erfiður rekstur Sýnar hefur ekki verið neitt leyndarmál; félagið var rekið með nærri sjö hundruð milljóna króna tapi á síðasta ári og þegar árshlutauppgjör fyrir þriðja ársfjórðung í fyrra var kynnt sagði Herdís Fjeldsteð, forstjóri félagsins, að unnið væri að gagngerri endurskoðun á rekstri fjölmiðlahlutans. Sýn tók mikla áhættu þegar það keypti sýningarréttinn að enska boltanum á fjóra milljarða; öll egg voru sett í þá körfu og mikið lagt í dagskrágerð en ekki leið á löngu þar til niðurskurðarhnífurinn var brýndur og framleiðslu nokkurra þátta var hætt. Ákvörðun Fjarskiptastofu um að banna Sýn að einskorða útsendingar frá leikjum deildarinnar við eigin myndlykla og smáforrit setti stórt strik í reikninginn, veitti Símanum tækifæri til að bjóða áskrifendum sínum aðgang að efninu. Sýn er í málaferlum við Fjarskiptastofu í tengslum við þá ákvörðun. Salan á vef -og útvarpshluta Sýnar hefur lengi verið á teikniborðinu; í desember fyrir þremur árum skoðaði stjórnin að selja fjölmiðlahlutann en nýir stjórnendur féllu frá þeim hugmyndum þar sem þeir töldu mikil verðmæti vera falin í þessum einingum. Halldór Kristmannsson, sem var um tíma einn stærsti hluthafinn í Sýn, lagði til í september fyrir tveimur árum að stjórn félagsins hæfi formlegar viðræður við Símann um kaup á vefmiðlum og útvarpsstöðvum. Þær urðu ekki að veruleika þá en hafa raungerst núna. Salan einfaldar rekstur Sýnar sem hefði hálfgerð hlutverkaskipti við Símann; Sýn yrði fjarskiptafyrirtæki með streymisveitu og íþróttastöðvar eins og Símann var þegar hann var með sýningarréttinn að enska boltanum. Nánast tímaspursmál hvenær sjónvarpsfréttir hætti Kaupin eru samt ekki frágengin og mörgum spurningum er ósvarað; viðmælendur Spegilsins bentu á að visir.is hefur til að mynda verið hjartað og miðjan í öllum fréttaflutningi og flæði starfsmanna á milli starfsstöðva verið mikið. Þeir sem skrifa fréttir á visir stökkva líka í sjónvarpsfréttir og öfugt. Útvarpsfréttir Bylgjunnar lúta sömu lögmálum. Þeir sem Spegillinn ræddi við töldu því eitt vera öruggt; gangi kaupin eftir sé það aðeins tímaspursmál hvenær sjónvarpsfréttir Sýnar verða teknar af dagskrá. Margt hefur verið reynt til að halda þeim úti; fyrir fimm árum var farin sú leið að læsa útsendingu þeirra fyrir öðrum en áskrifendum Sýnar en horfið frá þeirri hugmyndi þremur árum seinna. Í nóvember var svo ákveðið að hætta með útsendingar kvöldfrétta Sýnar um helgar. Tíðindin ekki þruma úr heiðskíru lofti Kolbeinn Tumi Daðason, fréttastjóri Sýnar, segir tilkynninguna í morgun hafa komið á óvart en tíðindin sjálf séu ekki þruma úr heiðskíru lofti. „Svo er þetta líka alltaf spurning hver er að kaupa. Og það kemur í ljós að þetta er erkifjendi Sýnar undanfarin ár; Síminn. Ég held að margir hafi verið ánægðir með það.“ Síminn sé fyrirtæki sem er á markaði, hafi verið í miklum vexti og gangi vel. „Ég held þess vegna að fyrstu viðbrögð hafi verið að fólk var hissa en síðan ánægt að sjá hverjir voru að kaupa og síðan kaupverðið sem er vel yfir markaðsvirði Sýnar. Ég held að flestir hafi skilið að þarna var tilboð sem var oft gott til að hafna.“ Skiptir máli hver eigandinn er Það hafi því skipt verulega miklu máli fyrir starfsmenn fréttastofunnar máli að þarna voru ekki á ferð lukkuriddarar eins og ófá dæmi eru um í íslenskri fjölmiðlasögu. „Það hafa ýmis nöfn verið nefnd varðandi eignarhald á fjölmiðlum. Og þetta er auðvitað viðkvæmt mál fyrir fréttastofuna þar sem fólk vinnur eftir siðareglum, ritstjórnarstefnu og er með allt upp á borðum sem vill bara segja fréttir. Þannig að það skiptir auðvitað máli hver er eigandi og fyrir hvern það vinnur.“ Kolbeinn viðurkennir engu að síður að framundan sé töluverð óvissa og hún sé mest í kringum sjónvarpsfréttirnar. „Það hefur reyndar verið óvissa með þær síðan elstu menn muna.“ Sjónvarpsfréttir verði keyrðar áfram, á þær horfi 50 þúsund manns en það sé ekki auðvelt að búa við svona óvissu þótt fólkið á Sýn sé orðið vant henni. „Þessi óvissa hvað verði um sjónvarpsfréttir eftir kaup Símans, ef allt gengur í gegn, er töluverð. “ Verði niðurstaðan sú að sjónvarpsfréttir verði lagðar af hefur Kolbeinn ekki áhyggjur af sínu fólki. „Þetta er fólk sem er þannig starfskraftar að það er vel sjóað sem hefur staðið af sér marga storma og alltaf komið undan þeim standandi í báðar fætur.“