Evrópskir leiðtogar og ráðamenn virðast vera að senda ákveðin og afdráttarlaus skilaboð til stjórnvalda í Bandaríkjunum um að átökin í Mið-Austurlöndum - og ekki síður afleiðingar þeirra - séu vandamál Bandaríkjamanna eins og staðan er núna. Leiðtogar Evrópuríkja hafa minnt á að þeir hafi ekki verið hafðir með í ráðum þegar árásirnar á Íran hófust, og þótt orkuverð hafi vissulega hækkað í Evrópu, þá snertir lokun Hormússundsins Evrópuríki minna en mörg önnur, til dæmis Kína og Japan. Leiðtogar Bretlands, Frakklands og Þýskalands hafa hafnað óskum Bandaríkjaforseta um að senda herskip í áttina að Hormússundi til að greiða fyrir olíuflutningum, þrátt fyrir óbeinar hótanir Trumps um helgina um að slíkt gæti boðað illt fyrir framtíð Atlantshafsbandalagsins. Þessi ummæli fóru ekki vel í Friedrich Merz, kanslara Þýskalands. „NATO er varnarbandalag, ekki bandalag um íhlutun,“ sagði Merz í gær; varnarmálaráðherra Þýskalands, Boris Pistorius bætti um betur og minnti á að „þetta er ekki okkar stríð; við hófum það ekki.“ Afstaða aðildarríkja Evrópusambandsins kom síðan berlega í ljós þegar utanríkisráðherrar aðildarríkjanna komu saman hér í Brussel í gær, í aðdraganda leiðtogafundar ESB sem verður á fimmtudaginn. Xavier Bettel, utanríkisráðherra Lúxemborgar gekk svo langt að saka Bandaríkjaforseta um að reyna að kúga Evrópuríkin. „Þetta er ekki stríð Evrópu, en beinir hagsmunir álfunnar eru í húfi,“ sagði Kaja Kallas utanríkismálastjóri Evrópusambandsins að fundi loknum í gær. Hún sagði ennfremur að Evrópa hefði engan áhuga á að taka þátt í hernaðaraðgerðum sem óvíst væri hvernig ætti að ljúka. Fyrir fundinn höfðu Frakkar ljáð máls á því að víkka út flotavernd sem Evrópusambandið hefur staðið fyrir í Rauðahafinu undanfarin misseri; sú tillaga fékk dræmar viðtökur hjá utanríkisráðherrunum í gær, sagði Kallas. Á sama tíma standa Evrópuríkin frammi fyrir því að viðhalda góðum samskiptum og samvinnu yfir Atlantshafið, ekki síst hvað varðar stöðuna í Úkraínu; nokkuð sem utanríkisráðherrar ESB ríkjanna ræddu einnig í þaula á fundi þeirra í gær. Evrópusambandið hefur til að mynda enn ekki fundið lausn á deilunni við Ungverja, sem standa í vegi fyrir afgreiðslu tugmilljarða evra láns til Úkraínu; nokkuð sem stjórnvöld í Bandaríkjunum, og sérstaklega Bandaríkjaforseti sjálfur, gæti mögulega liðkað fyrir með því að setja þrýsting á forsætisráðherra Ungverjalands.