Frá aldamótum hafa aðeins tvær þingsályktunartillögur fengið lengri umræðu í fyrri umferð en tillaga utanríkisráðherra um framhald aðildarviðræðna við Evrópusambandið. Umræðunni lauk seint í fyrrakvöld og höfðu þingmenn þá talað í rétt tæplega 20 klukkustundir. Það er tvöfalt meiri tími en fór í að ræða tillögu Össurar Skarphéðinssonar, þáverandi utanríkisráðherra, um hvort sækja ætti um aðild að ESB árið 2009. Fréttastofa skoðaði lengd umræðna í fyrri umræðu við þingsályktunartillögur frá aldamótum. Meginreglan er sú að stjórnartillögur fá yfirleitt umtalsvert lengri umræðu en þingmannatillögur og það heyrir til undantekninga að ein tillaga fái lengri umræðu en tíu klukkustundir. Tilhneigingin er sú að umræður um stjórnartillögur hafa lengst umtalsvert síðasta áratuginn. Sú þingsályktunartillaga sem lengsta umræðu fékk í fyrri umferð var tillaga Gunnars Braga Sveinssonar, þáverandi utanríkisráðherra, um að draga aðildarumsókn Íslands að Evrópusambandinu til baka. Hún var lögð fram í febrúar 2014 og var rædd í 23 klukkustundir og 32 mínútur í fyrri umferð. Sú tillaga náði hins vegar aldrei í gegn að ganga því hún fór aldrei til annarrar umræðu. Fyrsta fjármálaáætlun ríkisstjórnar Framsóknarflokks, Sjálfstæðisflokks og Vinstri grænna sem mynduð var 2017 var rædd í 21 klukkustund og 49 mínútur, en það var Bjarni Benediktsson fjármálaráðherra sem lagði þá tillögu fram. Þingsályktunartillaga Þorgerðar Katrínar um framhald aðildarviðræðna skipar svo þriðja sætið, en umræða um hana stóð yfir í 19 klukkustundir og 48 mínútur. Hún er nú komin á borð utanríkismálanefndar og er stefnt á að hún komi til síðari umræðu eftir sveitarstjórnarkosningar sem fara fram um miðjan maí. Svo að þjóðaratkvæðagreiðslan geti farið fram 29. ágúst þarf að samþykkja tillöguna fyrir 29. maí.