Óttast er að afleiðingar sívaxandi loftslagshlýnunar vari í þúsundir ára. Mikið ójafnvægi ríkir í inn- og útstreymi varma á jörðinni. Árin 2015 til 2025 eru þau ellefu heitustu frá upphafi mælinga að því er segir í nýrri skýrslu Alþjóðaveðurfræðistofnunarinnar . Í fyrsta skipti er fjallað um ójafnvægi sem myndast hefur í hitabúskap jarðarinnar, sérstaklega síðustu 20 ár. Hlutfallið milli þess hita sem streymir frá sólinni og þess sem jörðin sleppir aftur á að vera nánast hið sama. Þétting lofttegunda sem halda hita inni, koltvísýrings, metans og köfnunarefnisoxíðs, hefur aukist þannig að jafnvægið er horfið af mannavöldum, að sögn Celeste Saulo, forstjóra stofnunarinnar. Framfarir í vísindum hafi aukið skilning á þessu ójafnvægi. Magn efnanna hafi ekki verið meira í yfir 800 þúsund ár. Yfir 90 prósent umframhitans séu geymd í úthöfunum, sem hafi hitnað tvöfalt meira frá 2005 en næstu 45 árin þar á undan. Hærra hitastig sjávar hafi víðfeðmar afleiðingar, niðurbrot vistkerfa, sundrun líffræðilegs fjölbreytileika og minnkandi kolefnisviðtaka hafanna. Yfirborð sjávar hafi einnig hækkað verulega vegna bráðnunar íss og ekki sjái fyrir endann á því. „Hættuástand ríkir í loftslagsmálum veraldarinnar, við erum að ganga fram af jörðinni og allir loftslagsmælar eru rauðglóandi,“ segir Antonio Guterres aðalframkvæmdastjóri Sameinuðu þjóðanna. Hækkun hitastigsins þessi ellefu ár væri engin tilviljun og því yrði að grípa til aðgerða til bjargar jörðinni. „Skýrslan ætti að hafa varúðarmerkingu. Öngþveitið í loftslagsmálum stigmagnast og droll er dauðans alvara,“ sagði Guterres.