Færeyingar ganga að kjörborðinu í dag eftir að Aksel V. Johannesen lögmaður boðaði til kosninga í lok febrúar. Ósamkomulag í stjórnarsamstarfi Jafnaðarmanna og Framsóknar voru sagðar helsta ástæða stjórnarslitanna. Deilur um hækkun eftirlaunaaldurs, styttingu vinnuvikunnar og útboð Suðureyjarganga voru helstu ásteitingarsteinarnir. Þau mál auk innflytjendamála hafa verið mest áberandi í kosningabaráttunni en sjálfstæði frá Danmörku virðist eyjaskeggjum ekki ofarlega í huga, þrátt fyrir harða ásókn Bandaríkjaforseta í Grænland. Um 39 þúsund hafa kosningarétt í Færeyjum. Flestir stjórnmálaflokkar vilja að Færeyjar öðlist sjálfstæði en halda jafnframt tengslum við Danmörku vegna þess hve eyjarnar eru undirokaðar erlendum viðskiptum. Danir annast utanríkismál Færeyja. Landsmenn virðast sjá fjölgun útlendinga bæði sem áskorun og tækifæri. Færeyjar hafa á síðari árum reitt sig í auknum mæli á vinnuframlag innflytjenda sem hefur breytt miklu í áður einsleitu og fremur íhaldssömu samfélagi eyjanna. Skoðanakannanir benda til að Fólkaflokkurinn, sem hefur sjálfstæði ofarlega á stefnuskránni, fái flesta þingmenn kjörna á 33 manna lögþinginu og að Sambandsflokkurinn sé skammt undan. Útlit er fyrir að Jafnaðarmannaflokkur Aksels fái níu prósentum færri atkvæði en í seinustu kosningum og aðeins sex þingmenn. Enn er fimmtungur kjósenda óákveðinn samkvæmt skoðanakönnunum. Daginn eftir að Aksel V. Johannesen boðaði til kosninga gerði Mette Frederiksen hið sama í Danmörku, þannig að Færeyingar urðu að kjósa tvo fulltrúa á danska þingið og gengu að kjörborði tvisvar með 48 klukkustunda millibili. Jafnaðarmaðurinn Sjúrður Skaale hlaut 45 prósent atkvæða sem greinendur segja ekki gefa neinar vísbendingar um hvernig kunni að fara í dag, enda ráði persónukjör hverjir verði fulltrúar á danska þinginu.