Al­vot­ech vinnur nú að því að bæta við fram­leiðsluna í Bandaríkjunum með samningi við fram­leiðanda fyrir hluta lykilvara sinna. Það kom fram á fjár­festa­fundi félagsins og í um­fjöllun um málið að mark­miðið væri að draga úr áhættu af því að reiða sig á eina fram­leiðslu­einingu, auka af­hendingaröryggi og styðja við meiri sölu á alþjóðamörkuðum. Stjórn­endur sögðu að stefnt væri að því að ganga frá slíku sam­komu­lagi á fyrri helmingi ársins. Róbert Wess­man, stofnandi og stjórnar­for­maður Al­vot­ech, segir þó í viðtali við Við­skipta­blaðið í vikunni að það sé ekki verið að flytja kjarnann úr landi. „Við erum með fimm lyf á markaði núna, tvö af þeim í Bandaríkjunum, og við erum ein­fald­lega að undir­búa það að við munum fullnýta aðstöðuna á Ís­landi. Við erum búin að sækja um nýja lóð við hliðina á húsinu í Vatns­mýri en það mun senni­lega taka okkur fjögur ár að byggja og fá nýja aðstöðu samþykkta. Það skiptir máli að vera með næg af­köst til að geta sinnt allri eftir­spurn.“ Með öðrum orðum sér hann bæði fyrir sér aðra aðstöðu til fram­leiðslu í Bandaríkjunum og frekari upp­byggingu hér heima. Sam­kvæmt Róberti er Al­vot­ech nú komið með þann rekstrar­grunn að það geti horft aftur til vaxtar, en heildar­fjár­festing í félaginu fór yfir tvo milljarða dala í fyrra. „Við höfum verið að fjár­festa í gríðar­legum inn­viðum og erum með frábæra aðstöðu á Ís­landi, þar sem við fram­leiðum öll okkar lyf. Þá erum við með þrjátíu lyf í þróun,“ segir Róbert. Í fjár­festa­kynningu segir að Al­vot­ech sé með fimm líftækni­lyfja­hliðstæður á markaði, um 30 lyf í þróun og markaðstækifæri upp á meira en 185 milljarða dala. Róbert dregur fram að ný­legar breytingar á reglu­verki um þróun líftækni­lyfja­hliðstæða séu að vinna með félaginu. „Reglu­verkinu var nýverið breytt í kringum þróun á líftækni­lyfja­hliðstæðum. Við höfum þurft að gera tvær klínískar rannsóknir fyrir hvert lyf, þar af mjög stóra fasa 3-rannsókn í lokin. FDA og EMA hafa núna ákveðið að það þurfi ekki að fram­kvæma þessa stóru fasa 3-rannsókn lengur,“ segir Róbert og bætir við að Al­vot­ech hafi undir­búið sig fyrir þessa breytingu þar sem fasa 3-rannsóknin bætti í raun engu við hina rannsóknina. „Við reiknuðum með að þessi breyting myndi koma og breyttum öllu þróunar­ferlinu okkar í þá veru að þessi stóra klíníska rannsókn myndi detta út. Þannig að í staðinn fyrir að við værum að hefja þróun á einu nýju lyfi á 12 til 18 mánaða fresti jukum við af­köstin í að geta byrjað þróun á nýju lyfi á tveggja mánaða fresti.“ Í gögnum félagsins og í verðmati Nort­hland Capi­tal Markets á Al­vot­ech kemur fram að ný nálgun FDA geti lækkað þróunar­kostnað um­tals­vert og stytt tíma á markað. Spurður sér­stak­lega um einstök lyf í þróun eins og hliðstæðu við En­ty­vio og Keytruda segir Róbert tölu­verð tækifæri þar. „Með hliðstæðunni við En­ty­vio eigum við tækifæri til að vera fyrst á markað. Salan á frum­lyfinu nemur um 5-6 milljörðum dala á ári. Við höfum sagt að við munum senda um­sókn um þessa hliðstæðu til um­sagnar í ár. Það er mjög spennandi tækifæri.“ Í kynningu félagsins kemur fram að klínísk rannsókn á AVT16/AVT80 (En­ty­vio) hafi skilað jákvæðri niður­stöðu og að um­sókn um markaðs­leyfi sé væntan­leg á seinni hluta ársins. „Það er síðan meiri sam­keppni um hliðstæðu við Keytruda. Þetta er stærsta lyf í heimi og með um 33 milljarða dala veltu þegar markaðurinn opnast. Þar kusum við að vinna með Dr. Red­dys á Ind­landi þar sem við viljum vera með þetta lyf í okkar safni. Hráefnið verður fram­leitt af Dr. Red­dys á Ind­landi en við fram­leiðum full­unnu vöruna og verðum með þessu í betri sam­keppnis­stöðu kostnaðar­lega séð.“ Áskrifendur geta lesið ítarlegt viðtal Viðskiptablaðsins við Róbert hér en þar fer hann yfir fer yfir rekstur félagsins, framtíðarsýn í nýju hlut­verki og hluta­bréfa­verð.