Leyfisveitingarferli Hvammsvirkjunar, sem Landsvirkjun hyggst reisa í neðri hluta Þjórsár, hefur staðið yfir um langt skeið. Rekja má upphaf Hvammsvirkjunar til aldamótanna en síðustu leyfin komu í hús á dögunum. Gildandi virkjunarleyfi, það þriðja frá upphafi, var gefið út í desember síðastliðnum og standa undirbúningsframkvæmdir nú yfir. Stefnt er að útboði allra verkþátta í ár og miðað er við að virkjunin verði gangsett í lok árs 2030. Hvammsvirkjun verður sjöunda vatnsaflsvirkjunin á Þjórsár-Tungnaársvæðinu. Virkjunin, sem verður í neðri hluta Þjórsár, verður með uppsett afl upp á 95 MW og orkuvinnslugetu upp á 740 gígavattstundir á ári. Í grennd við Hvammsvirkjun hafa tvær aðrar virkjanir verið til skoðunar frá aldamótum, annars vegar Holtavirkjun og hins vegar Urriðafossvirkjun. Mat á umhverfisáhrifum lá fyrir árið 2003 en báðar virkjanir hafa verið í biðflokki rammaáætlunar frá upphafi á meðan Hvammsvirkjun hefur verið í nýtingarflokki frá árinu 2015. Umhverfis-, orku- og loftslagsráðherra lagði nýverið til að virkjanirnar yrðu færðar úr biðflokki í nýtingarflokk. Verkefnisstjórn rammaáætlunar hafði tvisvar sinnum áður lagt til að kostirnir yrðu færðir í nýtingaflokk, en í bæði skiptin færði Alþingi kostina aftur í biðflokk, fyrst árið 2013 og svo árið 2022. Meirihluti umhverfis- og samgöngunefndar Alþingis skilaði nýverið áliti þar sem fallist var á tillögu ráðherra um breytta flokkun Holtavirkjunar en lagt er til að Urriðafossvirkjun verði áfram í biðflokki. Nánar er fjallað um málið í Viðskiptablaðinu . Áskrifendur geta lesið fréttina í heild hér .