Týr hefur lengi verið þeirrar skoðunar að það sem helst sameini hörðustu stuðningsmenn aðildar Íslands að Evrópusambandinu sé að þeir kunni ekki að núvirða og hafi takmarkað fjármálalæsi. *** Í síðustu viku heyrði Týr viðtal við Magnús Árna Skjöld Magnússon formann Evrópuhreyfingarinnar, sem hlýtur að teljast eitt stærsta nafnið í Evrópuumræðunni hér á landi, í þættinum Reykjavík síðdegis á Bylgjunni Í lok viðtalsins spurðu þáttastjórnendur hvort Íslenskir skattgreiðendur myndu hagnast eitthvað á aðild að ESB, svona í ljósi þess að þeir myndu greiða umtalsvert fé til sambandsins ef til aðildar kæmi. Ekki stóð á svörum hjá formanni Evrópuhreyfingarinnar. Hann sagði að Íslendingar myndu hagnast svo mikið á aðildinni að þeir gætu annaðhvort keypt sumarhús á Spáni ellegar í Grímsnesinu fyrir ágóðann. Rökstuðningur Magnúsar var þessi: Íslendingar borga húsnæðislán sín fjórum til fimm sinnum á líftíma lánsins en ef við aðlöguðumst ESB þyrftum við aðeins að borga lánið 1,5 sinnum. Hægt væri að verja sparnaðinum í kaup á fasteign. Magnús lét vera að geta þess hvort allir fengju ekki örugglega fría blöðru og ís með dýfu við ­aðild. Væntanlega er það eitt af því sem kemur í ljós ef gengið verður til viðræðna við Brusselvaldið. *** Týr hefur töluverðar áhyggjur af umræðunni um áframhaldandi aðlögunarviðræður í aðdraganda þjóðaratkvæðagreiðslunnar í ágúst ef hún á að vera á því plani sem formaður Evrópuhreyfingarinnar hefur tekið sér stöðu á . Íslendingar greiða sín fasteignalán einu sinni á lánstímanum rétt eins og íbúar í aðildar­ríkjum ESB. Rétt er svo að minna á að nýlega boðaði Brusselvaldið til aðgerða vegna fasteignakreppunnar sem er í aðildarríkjunum, en hún lýsir sér þannig að fasteignaverð hefur hækkað margfalt á við launaþróun. Staðan er betri hér á landi. Samkvæmt ­gögnum Eurostat nam hlutfall húsnæðiskostnaðar hjá íslenskum heimilum 22,3% af heildarneyslu þeirra árið 2023. Í saman­burði við önnur lönd var þetta hlutfall um þriðjungi hærra í Finnlandi og ­Danmörku, þar sem það var nálægt 30%. Á Írlandi og í Frakklandi var hlutfallið einnig mun hærra, eða 26,3% og 26,2%. Það er kannski ekki skrýtið að grípa verði til gylliboða um ókeypis sumarbústaði, blöðrur og ís þegar staðreyndum er svona háttað. Týr er einn af föstum ritstjórnardálkum Viðskiptablaðsins. Þessi grein birtist fyrst í blaðinu sem kom út 25. mars 2026.