Í eldri kynslóðum var hann búinn lítilli 1,0 lítra bensínvél en í nýju gerðinni hefur sú vél vikið fyrir 1,5 lítra Full Hybrid-vél sem sameinar bensínvél og rafmótor. Kerfið skilar um 116 hestöflum, sem er umtalsverð aukning frá fyrri gerðum og gerir bílinn mun sprækari í akstri. Hröðunin endurspeglar þessa breytingu vel. Aygo X fer úr kyrrstöðu í 100 km/klst. á rúmum níu sekúndum, sem er talsvert betra en í fyrri gerðum Aygo. Þrátt fyrir aukin afköst helst eldsneytiseyðslan mjög lág. Opinber eyðslutala er um 3,7 lítrar á 100 kílómetra, sem gerir bílinn einn sparneytnasta kostinn meðal sambærilegra bíla. Hybrid-kerfið gerir bílnum einnig kleift að aka stundum eingöngu á rafmagni, einkum við hægan borgarakstur. Þetta dregur bæði úr eldsneytisnotkun og útblæstri. Nýja drifkerfið hefur þó haft áhrif á byggingu bílsins, en vegna stærri vélar hefur framhluti hans lengst lítillega miðað við fyrri gerð. Breytingin hefur þó lítil áhrif á heildarstærð bílsins og Aygo heldur áfram að vera stuttur og lipur í borgarumhverfi. Smæðin er einmitt meðal helstu kosta hans, þar sem auðvelt er að leggja bílnum í þröng stæði. Aygo er ágætlega útbúinn og nóg af tökkum í stýri og miðstokki. Aygo X Hybrid er boðinn í fjórum útfærslum: Play, Pulse, Envy og GR Sport. Allar útgáfur eru með sömu 1,5 lítra hybrid-vélinni en mismunurinn felst fyrst og fremst í búnaði og útliti. Með hybrid-kerfinu hefur Aygo tekið stórt skref fram á við. Bíllinn sameinar nú meiri afköst, lága eyðslu og nútímalegan búnað í þéttum borgarbíl. Fyrir þá sem leita að litlum og sparneytnum bíl til daglegra nota gæti ný kynslóð Aygo því reynst áhugaverður kostur. Verð fyrir Aygo X er frá 5.390.000 kr. Aygo er eftirtektarverður bíll þótt hann sé smár. Nánar er fjallað um málið í sérblaði Viðskiptablaðsins Bílar . Áskrifendur geta lesið viðtalið í heild hér .