Bankarnir þrír í Kaup­höllinni, Ís­lands­banki, Arion banki og Kvika bank, lækkuðu allir um 0,7-0,9% í við­skiptum dagsins í dag. Yfir helmingur af 931 milljónar króna veltu á aðal­markaðnum var með hluta­bréf Arion og Ís­lands­banka. Gengi Ís­lands­banka lækkaði um 0,75% í 226 milljóna króna veltu og stendur nú í 133 krónum á hlut. Gengi Arion lækkaði um 0,85% í 264 milljóna króna veltu og stendur nú í 174,5 krónum. Í nýrri fjár­málaáætlun, sem var kynnt eftir lokun markaða á fimmtu­daginn, var greint frá því að til stæði að afla viðbótar­skatt­tekna frá fyrir­tækjum í fjár­mála­geiranum. Ekki var nánar til­greint um um­fang slíkra að­gerða né heldur nákvæm­lega hvaða skatt væri um að ræða. Þórður Snær Júlíus­son, fram­kvæmda­stjóri þing­flokks Sam­fylkingarinnar, upp­lýsti í að­sendri grein á Vísi sem birtist á laugar­daginn að horft sé til þess að hækkun banka­skattsins eigi að skila ríkis­sjóði um 6 milljarða króna í nýjar tekjur á næsta ári. Sjá einnig Boða hærri skatta á fjár­mála­fyrir­tæki Hinn svo­nefndi banka­skattur er sér­stakur skattur er lagður á fjár­mála­fyrir­tæki sem nemur 0,145% af heildar­skuldum viðkomandi lögaðila yfir 50 milljörðum króna í lok hvers árs. Fjögur fjár­mála­fyrir­tæki fá þennan skatt álagðan og greiddu sam­tals 6,7 milljarða króna vegna rekstrarársins 2024. Reitir ekki lægri síðan í septem­ber Mesta breytingin var á gengi fast­eignafélagsins Reita sem lækkaði um 3,5% í 127 milljóna króna veltu. Gengi Reita stendur nú í 110 krónum og hefur ekki verið lægra síðan í byrjun septem­ber. Til samanburðar fór gengi félagsins hæst í 131 krónu á hlut þann 6. mars síðastliðinn. Sé leiðrétt fyrir fyrri arðgreiðslu vegna rekstrarársins 2025 upp á 2,3 krónur á hlut (arðsviðmiðunardagur var 27. mars) hefur gengi félagsins lækkað um 14,3% í mánuðinum. Gera má ráð fyrir að lækkun á gengi Reita í dag megi rekja til umræddrar arðgreiðslu. Eins og Við­skipta­blaðið hefur fjallað um kom til skoðana­skipta milli Guð­mundar Inga Jóns­sonar, stærsta einka­fjár­festisins í hlut­hafa­hópi Reita, og stærsta hlut­hafans, Gildis líf­eyris­sjóðs vegna ólíkra sjónar­miða um val á stjórnar­for­manni fast­eignafélagsins. Sjá einnig „Ég er ekki að fara að selja þessa hluti á ein­hverri útsölu“ Guð­mundur sagði að hann hafi hugsað sér að minnka stöðu sína í Reitum frekar en það væri þó háð því að markaðs­gengi hluta­bréfa félagsins væri ásættan­legt.