Kim Fournais, stofnandi Saxo Bank og núverandi stjórnar­for­maður bankans, segir bestu fjár­festingu ævi sinnar hafa verið Saxo Bank sjálfan, en þá verstu eyjuna Vejrø, þar sem hann kveðst þegar hafa lagt út um 300 milljónir danskra króna. Þetta kemur fram í nýrri um­fjöllun Børsen í greina- og hlað­varps­röðinni How I invest , þar sem Fournais fer yfir hvernig hann ráð­stafar eigin fjár­munum eftir að hafa byggt upp einn þekktasta fjár­festingar­banka Dan­merkur. Í viðtalinu lýsir Fournais fjár­festingar­stefnu sinni sem blöndu af hefðbundnum hluta­bréfa­fjár­festingum og persónu­legri langtímasýn. Hann nefnir meðal annars eign í Novo Nor­disk, ræðir sínar bestu og verstu fjár­festingar og segir að hann hefði frekar kosið að verja háum fjár­hæðum í að byggja upp dönsku eyjuna Vejrø en að kaupa sér lúxusíbúð í Dúbaí. Að hans sögn sé eyjan fjár­hags­lega dýr fjár­festing, en hún hafi gildi sem fari út fyrir hreina arð­semi, meðal annars vegna upp­byggingar, sjálf­bærni og at­vinnu­sköpunar. Fournais segir að Vejrø hafi hingað til kostað hann um 300 milljónir danskra króna. Þegar hann keypti eyjuna árið 2005 hafi þurft að hefja verkið á því að fjar­lægja um 100 tonn af rusli, endur­byggja aðstöðu og gera svæðið not­hæft á ný. Hann segir eyjuna nú að miklu leyti sjálf­bæra, með vind­myllu frá Vestas, sólar­sellum, raf­hlöðu­geymslu og svo­kölluðu endur­nýjandi búi. Þótt hann telji ólík­legt að hann fengi 300 milljónir fyrir eyjuna ef hann seldi hana strax, segist hann enn líta á hana sem góða langtíma­fjár­festingu. „ „Allar slæmar fjár­festingar verða langtíma­fjár­festingar,“ segir hann meðal annars í viðtalinu. Á hinum endanum stendur Saxo Bank, sem Fournais segir bestu fjár­festingu sína. Hann rifjar upp að hann hafi upp­haf­lega ætlað sér nám í véla­verk­fræði, en aldrei lokið því, og hafi þess í stað byrjað að starfa í fjár­festinga­um­hverfi þar sem honum varð fljótt ljóst að hægt væri að gera hlutina betur fyrir við­skipta­vini. Úr varð að hann stofnaði árið 1992, ásamt Lars Seier Christen­sen, fjár­festingar­fyrir­tækið Midas sem síðar varð að Saxo Bank. Um­fjöllun Børsen kemur á tíma­mótum hjá bankanum. Eins og Við­skipta­blaðið greindi frá í mars í fyrra keypti sviss­neski einka­bankinn J. Saf­ra Sarasin um 70 pró­senta hlut í Saxo Bank fyrir 1,12 milljarða evra, sem jafn­gilti þá um 164,5 milljörðum ís­lenskra króna. Við þau við­skipti hélt Fournais sínum 28 pró­senta hlut og var áfram for­stjóri bankans. Sjá einnig Komnir með 71% stöðu og sparka stjórn­endum Síðan hefur staðan breyst. Í byrjun mars á þessu ári lauk kaupunum form­lega, hlutur J. Saf­ra Sarasin reyndist vera um 71 pró­sent og Fournais lét af störfum sem for­stjóri til að taka við sem stjórnar­for­maður. Um leið var Daniel Bel­fer, sem áður stýrði Bank J. Saf­ra Sarasin, skipaður nýr for­stjóri Saxo Bank. Í til­kynningu frá Saxo kemur jafn­framt fram að Fournais haldi áfram með um 28 pró­senta eignar­hlut. Hamingjan felst ekki í auð Við­skipta­blaðið fjallaði einnig ný­lega um upp­stokkun í yfir­stjórn bankans í kjölfar eig­enda­skiptanna. Þar kom fram að með nýjum meiri­hluta­eig­anda fylgdi um­fangs­mikil endur­skipu­lagning á fram­kvæmda­stjórn og stjórn bankans, að Fournais hyrfi úr for­stjórastólnum og að fleiri lykil­stjórn­endur vikju einnig úr störfum. Í þeirri um­fjöllun var vísað til þess að áhugi nýja eig­andans snerist ekki síst um tækni­lega inn­viði Saxo Bank fremur en núverandi stjórn­enda­hóp. Sjá einnig Söluverð Saxo lækkar eftir háa sekt Fournais segir eignarhlut sinn í Saxo Bank vissulega vera verulegan á pappír en leggur áherslu á að það sé engu að síður fyrst og fremst pappírseign þar sem bankinn sé ekki skráður á markað. Hann segir peninga skipta máli upp að vissu marki en að eftir að grunnþörfum sé fullnægt sé það ekki endilega auðurinn sjálfur sem færi mesta hamingju. Frekar nefni hann tíma með fjölskyldu, hreyfingu, náttúru og mat sem það sem skipti hann mestu.