Sviss­neski banka­hópurinn J. Saf­ra Sarasin Group er orðinn meiri­hluta­eig­andi í danska Saxo Bank og fer nú með 71% hlut, sam­kvæmt kaup­hallar­til­kynningu bankans í morgun sem danska við­skipta­blaðið Børsen greinir frá. Með eig­enda­skiptunum fylgir um­fangs­mikil endur­skipu­lagning á fram­kvæmda­stjórn og stjórn bankans, þar sem bæði for­stjóranum og lykil­stjórn­endum verður skipt út. Saf­ra Sarasin til­kynnti á síðasta ári að sam­komu­lag lægi fyrir um kaup á um 70% hlut í Saxo Bank með fyrir­vara um hefðbundið samþykki eftir­lit­saðila. Nú hefur hluturinn verið stað­festur sem 71% og breytingarnar virkjast í kjölfarið. Stofnandinn Kim Fournais lætur af störfum sem for­stjóri Saxo Bank og tekur við sem stjórnar­for­maður. Í hans stað tekur Daniel Bel­fer, sem hingað til hefur gegnt for­stjórastöðu hjá J. Saf­ra Sarasin, við sem nýr for­stjóri Saxo Bank, sam­kvæmt frétt Børsen. Með þessu er rofin sú sam­fellda stjórnun sem Fournais hefur haldið utan um ára­bil og sviss­neski eig­andinn fær beina aðkomu að dag­legri stjórn bankans með for­stjóra úr eigin röðum. Lykil­stjórn­endur víkja Eig­enda­skiptin kalla einnig fram breytingar á fleiri lykil­stöðum. Søren Kyhl, að­stoðar­for­stjóri og rekstrar­stjóri (COO), lætur af störfum tafar­laust og sömu­leiðis John Car­michael, sem hefur verið yfir­maður reglu­vörslu og áhættustýringar (Chief Compli­ance and Risk Officer) og setið í æðstu stjórn bankans. Í stað Kyhl tekur Henrik Juel Vill­berg, sem hefur verið stað­gengill rekstrar­stjóra og starfað hjá Saxo í meira en tvo ára­tugi, við sem að­stoðar­for­stjóri og tekur sæti í fram­kvæmda­stjórn. Sam­hliða breytingum í fram­kvæmda­stjórn er ráðist í upp­stokkun í stjórn bankans. Sam­kvæmt Børsen stíga nokkrir stjórnar­menn til hliðar og nýir koma inn til næsta aðal­fundar, meðal annars ein­staklingar tengdir nýja meiri­hluta­eig­andanum, auk þess sem Kim Fournais tekur við sem stjórnar­for­maður. Vilja starfrænu innviðina ekki fólkið Børsen hefur áður fjallað um að einn stærsti drif­kraftur áhuga Saf­ra Sarasin á Saxo Bank hafi verið að­gangur að starfrænum inn­viðum bankans, sem eru byggðir upp fyrir verðbréfa­við­skipti, gjald­eyri og af­leiður. Saf­ra Sarasin hefur lengi verið í einka­bankaþjónustu og eignastýringu en Saxo er þekkt fyrir við­skipta- og fjár­festinga­kerfi sitt, sem þjónar bæði smærri fjár­festum og fag­fjár­festum. Það fellur að áherslum sem komu fram þegar aðilarnir greindu fyrst frá sam­komu­lagi um meiri­hluta­kaup, þar sem mark­miðið var meðal annars að styrkja langtíma­vaxtar­mögu­leika með sam­legð milli einka­bankaþjónustu og stafrænnar fjár­festinga- og við­skiptatækni.