Andri Þór Guðmundsson, stjórnarformaður Beru, segir nýtt skipulag samstæðunnar opna betur fyrir það að fengnir verði „strategískir“ samstarfsaðilar inn í eigendahóp einstakra félaga í eigu Beru. „Eitt af mínum verkefnum á næstu 12 mánuðum eða svo, að því gefnu auðvitað að ytri aðstæður séu okkur hagfelldar, er að draga erlent fjármagn inn í sérstakt félag í kringum Collab útflutninginn til þess að fjármagna þann vöxt,“ sagði Andri Þór á fjárfestafundi félagsins. Nýtt fyrirkomulag liðki fyrir frekari ytri vexti Í kjölfar breytinga á skipulagi samstæðunnar, sem tilkynnt var um í lok síðasta árs, eru undir móðurfélaginu Beru rekstrarfélögin Ölgerðin, Kjarnavörur, Gæðabakstur, Collab, Iceland Spring, Danól og Mýrar fasteignafélag. Móðurfélagið Bera mun veita dótturfyrirtækjunum stoðþjónustu og stuðla að aukinni stærðarhagkvæmni. Í lok febrúar ákvað Andri Þór að láta af störfum sem forstjóri félagsins og færa sig í hlutverk stjórnarformanns. Í því hlutverki hyggst hann sinna stórum og sértækum verkefnum fyrir félagið sem snúa m.a. að framtíðaruppbyggingu erlenda hluta starfseminnar og viðskiptaþróun með áherslu á ytri vöxt félagsins. Sjá einnig Hættir sem forstjóri og sækist eftir formennsku Jón Þorsteinn Oddleifsson, nýr forstjóri Beru, sagði á fjárfestafundi félagsins á fimmtudaginn að nýtt fyrirkomulag samstæðunnar gefi tækifæri til þess að bæta við fleiri stoðum undir reksturinn. „Við sáum það á síðasta ári hvað það getur skipt miklu máli að þegar það hristir í einni stoð, eins og gerði í tilfelli Iceland Spring í fyrra, þá koma nýjar stoðir undir til að halda rekstrinum stöðugum og öruggum.“ Mynd tekin úr fjárfestakynningu Beru. Á henni er sýnt nýtt fyrirkomulag samstæðunnar þar sem móðurfélagið Bera sinnir stoðþjónustu við rekstrarfélög samstæðunnar. Andri Þór tók í kjölfarið til máls og sagði að ásamt því að liðka fyrir ytri vexti þá væri jafnframt verið að auðvelda aðkomu valinna samstarfsaðila að tilteknum rekstrarfélögum. „Það er ekkert loku fyrir það skotið að við gætum fengið eignaraðila með okkur inn í einstök félög ef það hentar okkur strategískt. Ég ítreka að það eru engar fyrirætlanir um það, en þetta leikskipulag opnar á þennan möguleika.“ Hann vakti einnig athygli á þeim samlegðartækifærum sem liggja í breyttu skipulagi og nýlegum kaupum á Kjarnavörum og Gæðabakstri. „Við erum þegar byrjuð að tína þau tækifæri sem liggja hérna beint fyrir framan okkur og það eru tugir milljóna sem liggja bara í einföldum aðgerðum. Það eru líka náttúrlega gríðarlega miklir möguleikar í vöruþróun og markaðssetningu.“ Áætlað er að tekjur Beru vaxi umtalsvert á yfirstandandi fjárhagsári í kjölfar yfirtöku á Gæðabakstri og Kjarnavörum. Ölgerðin jafnoki stórra erlendra aðila Andri Þór sagði að útrás ákveðinna drykkja og vöruþróun innan Ölgerðarinnar sé farin að vekja athygli alþjóðlega. Sem dæmi um vel heppnaða vöruþróun nefndi hann P*RN víngosið sem náði 17% hlutdeild í ÁTVR í fyrra þrátt fyrir að varan hafi verið sett á markað um mitt ár. „Ég er þess fullviss að eftir að hafa verið að baksa í þessu í 24 ár að Ölgerðin er algjör jafnoki ef ekki fremri heldur en margir af okkar kollegum úti. Ég finn það bara, það er verið að nálgast okkur af mikilli virðingu og lotningu fyrir þessum hæfileika að þróa og markaðssetja vörur.“ Það væri verðmætt fyrir Ölgerðina að geta prófað nýja drykki og konsept í kringum þá á íslenska markaðnum með einföldum og ódýrum hætti. „Við erum að búa til konsept.“ Félagið sé með framleiðslugetu sem sé í stakk búin til þess að takast á við litlar framleiðslulotur „ólíkt því sem margir af okkar kollegum úti eru að díla við“, sagði Andri Þór. Andri Þór tók þessa drykki sem dæmi um vel heppnaða vöruþróun. 7-Eleven sýnt áhuga á samstarfi í vöruþróun Sem dæmi um vel heppnað samstarf við erlenda aðila á markaðnum nefndi hann Tuborg Lille Jul, sem Ölgerðin þróaði í samráði við Tuborg Carlsberg. „Þetta samstarf er að leiða af sér síðan enn frekara þróunarsamstarf á vöru sem mun líta dagsins ljós vonandi síðar á þessu ári. Tuborg Carlsberg er ekkert eina fyrirtækið sem við erum að vinna með,“ sagði Andri Þór og bætti við að félagið væri bundið trúnaði um önnur verkefni. „Þetta verður m.a. eitt af mínum verkefnum að það er að tína þessi tækifæri upp af götunni, vinna úr þeim og fljúga áfram með þau.“ Á fundinum sagði Andri Þór að félagið sé að reyna að nýta sér þær tengingar á Bandaríkjamarkaði sem það er með í gegnum Iceland Spring, sem er til sölu í um 12 þúsund 7-Eleven verslunum. Hann sagði 7-Eleven hafa áhuga á að þróa vörur með Ölgerðinni. Hann sýndi dæmi um vöru sem ekki hafi hefur verið tekin endanleg ákvörðun um hvort að fari á markað eða ekki. Hún byggi á uppskriftum og hugmyndum sem Ölgerðin hafi unnið að hér á landi, meðal annars Mist og Collab. „Við getum sagt að eitt af mínum lykilverkefnum á næstu misserum vonandi er að nýta í raun og veru þetta „powerhouse“ sem að Ölgerðin er þegar kemur að því að búa til konsept og nýjar vörur og fá erlenda aðila inn í þetta með okkur.“ Á fundinum var sýnt dæmi um vöru sem gæti verið unnin áfram í samstarfi við 7-Eleven. Gæti tekið 10 ár að koma Collab útflutningi í hagnað Hann sagði Collab vera eitt af þessum stóru verkefnum sem hann muni fást við í hlutverki stjórnarformanns. Hann rifjaði upp að fyrir tveimur árum ákvað félagið að setja um einn milljarð króna í útrás Collab. Á síðastliðnum tveimur árum hafi Bera fjárfest fyrir tæplega 700 milljónir króna í þetta verkefni. „Þetta, eins og ég hef alltaf lagt áherslu á, er langtímaverkefni. Þetta er fjárfesting sem tekur mörg ár að skila sér. Ég get ekki nefnt árafjöldann með neinni vissu en ég get alveg held ég fullvissað ykkur um það að þetta er ekki að fara að gerast á næsta eða þar næsta ári, að Collab fari að skila hagnaði í útflutningi, heldur erum við miklu frekar að líta til 10 ára tímabils eða eitthvað slíkt.“ Varðandi áform um að sækja nýtt fjármagn sagði Andri Þór sagði að þar skipti máli fyrir Beru að finna aðila sem hafi annars vegar þolinmæði og hins vegar þekkingu til þess að hjálpa Collab að brjótast inn á lykilmarkaði erlendis. Eins og kom fram í afkomutilkynningu Beru hafa viðtökur í Þýskalandi ekki verið í samræmi við áætlanir. Andri Þór benti á að Ölgerðin hafi byrjað innreið á þýska markaðinn fyrir um ári síðan, en bætti við að nú sé félagið að draga úr fjárfestingu á þeim markaði. Félagið verði þó áfram á þýska markaðnum, en muni framvegis leggja meiri áherslu á netsölu, til að mynda á Amazon, og að markaðssetja sig meira á sviði heilsu (e. fitness). Sjá einnig Draga úr kostnaði við útrás Collab Í Austurríki sé Collab aftur á móti komið með „alveg gríðarlega sterka dreifingu“. Þar sé Collab komið í 1.340 búðir. „Þetta er eitt af því sem mér hefur fundist alveg einkenna þetta Collab-verkefni - við fáum rauðan dregil þegar við bjóðum vöruna til innkaupaaðila vegna þess að okkur hefur tekist að búa til konsept sem hittir einhvern veginn á eitthvað „sweet spot“. Við erum á koffíndrykkjamarkaði sem hefur verið tiltölulega karlægur og [höfðað til] ungra karlmanna. Hér erum við að draga að neytendur sem eru konur á aldrinum 18 og upp í 50+. Þetta eru neytendur sem hafa ekki verið í vöruflokknum áður.“ Þrátt fyrir öfluga dreifingu í Austurríki sé velta í búðum enn tiltölulega lág og því verði verkefnið þar á næstunni að skapa vitund um vöruna meðal viðskiptavina. Andri Þór sagði stöðuna í Danmörku, vera í öfuga átt en þar sé Ölgerðin að glíma við tiltölulega litla dreifingu en mikla veltu innan búða. „Það sem að við höfum gert er að við höfum breytt um dreifingaraðila. Við prófuðum að gera þetta sjálf, settum upp okkar eigið apparat, Collab DK, en frá og með 1. mars þá höfum við [verið í samstarfi við] rótgróinn dreifingaraðila og erum að fara þarna í markaðssókn,“ sagði hann og bætti við að stefnt sé að því að stórauka dreifingu í Danmörku. Í afkomutilkynningu Beru, sem var birt á fimmtudaginn, kom fram að áætlað sé að bæta við einum markaði til viðbótar á þessu ári. EBITDA áhrifin af markaðssetningu Collab vörunnar erlendis hafi verið neikvæð um 369 milljónir króna á síðasta fjárhagsári og heildaráhrifin frá upphafi séu metin á 688 milljónir króna. Samkeppnisfær um framleiðslu á erlenda markaði Ölgerðin skrifaði haustið 2024 undir samning um lóð á Hólmsheiði sem er um 45 þúsund fermetrar. Þar er stefnt að uppbyggingu vöruhúsa- og dreifingarmiðstöð sem áætlað er að hefji starfsemi árið 2029. Andri Þór sagði að með hinu fyrirhuguðu uppbyggingu Hólmsheiði telji félagið sig geta styrkt samkeppnisforskot á markaðnum, annars vegar með lægri rekstrarkostnaði og hins vegar með hærra þjónustustigi. Félagið sé „á fullu“ með erlendum ráðgjöfum að hanna húsið að innan. Sjá einnig Hand­söluðu lóðar­vil­yrði á Hólms­heiði Hann sagðist hafa þá trú að fyrirkomulag í kringum hýsingu og dreifingu eigi eftir að breytast mjög mikið á næstu árum. Önnur lykilástæða fyrir verkefninu sé sú að það sé þrengt að félaginu á Grjóthálsi. „Við höfum ekki fleiri fermetra til þess að kaupa fleiri vélar,“ sagði Andri Þór. „Áætlunin þegar vöruhúsið [á Grjóthálsi] fer er að a.m.k. helmingurinn af því plássi verði nýtt þá undir tæki sem gera okkur kleift að framleiða annars konar drykkjarvörur eða í annars konar umbúðum og ráðast inn á ný svið á drykkjarvörumarkaðnum. Það gerir okkur síðan aftur að enn betri samstarfsaðila fyrir erlendu kollega okkar þar sem við getum þá farið að framleiða fyrir þá fyrir erlenda markaði. Ég er líka þess fullviss eftir að hafa verið í þessum útflutningsmálum núna um nokkurt skeið að við séum að fullu samkeppnisfær við erlenda aðila varðandi framleiðslu hérna á Íslandi. Flutningskostnaðurinn er ekki að gera út af við það.“ Andri Þór tók fram að myndin á hægri hönd væri ekki endanlegt útlit hússins. Teikningin ætti einungis að gefa hugmynd um mögulega nýtingu lóðarinnar.