Haf­steinn Hauks­son, aðal­hag­fræðingur Kviku, segir að stríðsátökin við Persaflóa séu farin að hafa skýr áhrif á bæði alþjóða­markaði og ís­lenskt efna­hags­líf. Í færslu á Lin­kedIn, þar sem hann rifjar upp erindi sitt á há­degis­fundi Kviku eignastýringar á föstu­dag, segir hann að átökin beri öll ein­kenni fram­boðs­skells sem muni ýta undir verðbólgu, draga úr hag­vexti og herða fjár­mála­skil­yrði. Að mati Haf­steins hafa Bandaríkin og Ís­rael mögu­lega misst tökin á átökunum. Hann segir nú raun­veru­lega hættu á að mark­mið að­gerðanna færist til og að truflanir dragist á langinn. Jafn­vel þótt Bandaríkin dragi sig til baka standi Íran eftir með raun­veru­legt vald yfir Hor­mússundinu, einni mikilvægustu flutningsæð olíu og hrávara í heiminum. Í færslunni segir Haf­steinn að Íran sé nú í varnar­baráttu þar sem mark­miðið sé að þrauka og þreyta and­stæðinginn. Hann bendir á að ósam­hverfur hernaður hafi verið hluti af hernaðarsýn íranska ríkisins frá níunda ára­tugnum. Íran þurfi því ekki að jafna hernaðar­getu Bandaríkjanna ef landið geti í staðinn valdið veru­legum skaða á hag­kerfum Persaflóaríkja og þrengt að flæði hráefna með til­tölu­lega ódýrum vopnum á borð við Shahed-dróna. Haf­steinn segir að áhrifin sjáist skýrast á orkumörkuðum. Olíu­verð hafi hækkað um nærri 50 pró­sent og ís­lenskir neyt­endur séu þegar farnir að greiða 30 til 40 krónum meira fyrir hvern lítra af bensíni. Hann segir jafn­framt að fleiri fyrstu stigs áhrif muni bætast við í apríl þegar heimurinn fari að finna fyrir skorti á áburði, nafta (sem er mikilvægt hráefni í plast og um­búðir), helíumi og fleiri aðföngum og hráefnum. Að mati Haf­steins er þetta dæmi­gert fram­boðsá­fall. Hann segir slíkt áfall jafnan leiða til meiri verðbólgu, minni hag­vaxtar og þrengri fjár­mála­skil­yrða. Ís­land sé að sumu leyti betur varið en mörg önnur ríki vegna mikillar inn­lendrar endur­nýjan­legrar orku­fram­leiðslu. Það breyti þó ekki því að áhrifin verði veru­leg. Miðað við að Brent-olía haldist í kringum 100 dali á tunnu segist hann búast við að verðbólga verði yfir 5 pró­sentum út árið hér á landi, að hag­vöxtur verði um einu pró­sentu­stigi minni en ella og að Seðla­bankinn þurfi að minnsta kosti að hækka vexti einu sinni enn. Hann segir jafn­framt að nær allir eigna­flokkar hafi gefið eftir nema orku­tengdar eignir og hrávörur, og að jafn­vel hefðbundin skjól hafi ekki staðið af sér óvissuna með sama hætti og áður. Markaðir séu því komnir inn á svið djúprar óvissu fremur en mælan­legrar áhættu. Við slíkar aðstæður megi búast við miklum sveiflum á eigna­verði þar sem markaðir endur­meti stöðugt líkurnar á ólíkum sviðs­myndum. Í ljósi þessa segist Haf­steinn hallast að eigna­safns­hugsun þar sem fjár­festar fari var­lega í eigna­dreifingu án þess þó að af­sala sér alveg mögu­leikanum á hækkunum ef markaðir taki við sér á jákvæðum fréttum eða ef átökin leysast hraðar en nú virðist lík­legt.