Flug­félög víða um heim hafa dregið veru­lega úr vaxtará­formum sínum eftir að stríðið við Íran raskaði elds­neytis­fram­boði og ýtti verði á þotu­elds­neyti upp með miklum hraða. Financial Times greinir frá því að flug­félög hafi fyrir átökin gert ráð fyrir 5,4 pró­senta aukningu í fram­boði sæta í apríl miðað við árið áður, en nú hafi sú spá verið skorin niður í aðeins 0,2 pró­senta vöxt. Áhrifin virðast þegar vera mest í Asíu. Kóreska flug­félagið Korean Air sendi starfs­fólki sínu tölvupóst í vikunni þar sem sagði að félagið myndi „færa sig yfir í neyðar­ham“ og leita allra leiða til að lækka kostnað. For­stjóri félagsins, Woo Kee-hong, sagði að verð á elds­neyti í apríl, 450 sent á hvert gall­on, væri langt yfir þeim 220 sentum sem rekstraráætlun félagsins byggðist á. Flug­félagið sagði jafn­framt að elds­neyti væri að jafnaði um 30 pró­sent af kostnaði, en það hlut­fall gæti meira en tvöfaldast haldist verðið hátt. Asiana Air­lines, næst­stærsta flug­félag Suður-Kóreu og að stærstum hluta í eigu Korean Air, hefur þegar ákveðið að fella niður 14 fram og til baka flug á fjórum alþjóða­leiðum til Kína og Kambódíu í apríl og maí til að verja af­komu félagsins. Sam­kvæmt gögnum frá Cirium hafa asísk flug­félög utan Kína og Ind­lands einnig skorið niður áætlaðan vöxt í apríl úr 5,8 pró­sentum í 2,8 pró­sent. Richard Evans hjá Cirium Ascend Consultan­cy segir við FT að varðveisla lausa­fjár verði lykil­at­riði fyrir flug­félög við þessar aðstæður. Hann telur lík­legt að þau byrji á að skera niður veikustu leiðirnar, leggja elds­neytis­frekustu vélarnar til hliðar og fresta hluta viðhaldsút­gjalda. Sér­stak­lega virðast asísk flug­félög ber­skjölduð gagn­vart lokun Hor­mússundsins, þar sem þau reiða sig mjög á inn­flutning á olíu frá Miðaustur­löndum. FT bendir á að átökin á Persaflóa­svæðinu hafi raskað flutningi á um fimmtungi allrar hráolíu í heiminum og valdið miklum verðhækkunum á hreinsuðum af­urðum á borð við þotu­elds­neyti og dísilolíu. Þotu­elds­neyti sé þar að auki viðkvæmt fyrir truflunum þar sem það geymist mun skemur en hráolía áður en gæði þess fara að rýrna. Heildsölu­verð á þotu­elds­neyti hefur sam­kvæmt FT tvöfaldast frá upp­hafi átakanna. Fjöldi flug­félaga, þar á meðal Air India, Cat­hay Pa­cific, Thai Airwa­ys og Qantas, hefur þegar boðað verðhækkanir eða sér­stök elds­neytisálög á far­miða til að mæta kostnaðinum. Aðrir sér­fræðingar telja að verðið geti enn hækkað. Edward Mor­se hjá Hartree Partners sagði við blaðið að markaðurinn ætti eftir að þrengjast enn frekar. Áhyggjur af skorti hafa einnig aukist í Evrópu. Stjórn­endur tveggja stærstu flug­félaga álfunnar sögðu FT að þeir hefðu enn sýn á birgðir næstu fjórar til sex vikur en að fylgst væri með stöðunni dag­lega. FT hafði áður greint frá því að síðasta þekkta sending þotu­elds­neytis frá Miðaustur­löndum til Bret­lands væri væntan­leg í þessari viku. Bretar hafa á undan­förnum mánuðum sótt að minnsta kosti helming þotu­elds­neytis síns til Miðaustur­landa, eftir að landið sneri baki við rúss­neskum birgðum í kjölfar inn­rásarinnar í Úkraínu og inn­lend hreinsi­geta dróst saman. Samtök flug­félaga í Bret­landi hafa þó reynt að róa markaðinn og sagt að aðildar­félög þeirra sjái að svo stöddu ekki beina röskun á fram­boði þotu­elds­neytis. Á sama tíma sýndi könnun meðal evrópskra flug­valla að 10 pró­sent svar­enda töldu mikla hættu á skorti, þótt meiri­hluti segðist enn búa við birgðastöðu í samræmi við eðli­leg viðmið. Sam­kvæmt FT er því flug­geirinn kominn í varnar­stöðu. Þar sem elds­neytis­kostnaður hefur rokið upp, fram­boð er undir þrýstingi og birgða­keðjur orðnar viðkvæmari neyðast flug­félög til að skera niður vöxt, endur­meta leiða­kerfi og undir­búa sig undir lengra tíma­bil hærri kostnaðar. Fyrir farþega gæti það þýtt færri flug, hærra far­gjald og aukin elds­neytis­gjöld á komandi mánuðum.