Væntingavísitalan er mæling á skoðun almennings á hvernig staðan sé í efnahags- og atvinnumálum og hverjar þau telja að horfurnar verði eftir hálft ár. Ef vísitalan er 100 eru jafn margir jákvæðir og neikvæðir. Ef hún er hærri eru fleiri jákvæðir og ef hún er lægri eru fleiri neikvæðir. Væntingavísitalan mældist 56,3 í mars og hefur ekki verið lægri frá haustinu 2020, þegar heimsfaraldur reið yfir. Þar áður mældist vísitala síðast lægri í lok árs 2010. Lægsta gildi vísitölunnar frá upphafi var 19,5 í janúar 2009. Jón Bjarki Benediktsson, aðalhagfræðingur Íslandsbanka, segir að um sé að ræða býsna útbreidda svartsýni. Vísitalan hafi lækkað allhratt undanfarna fjórðunga, en fyrir ári stóð vísitalan til að mynda í 106,9. „Það er athyglisvert að sjá að þróunin er svolítið ólík því sem við höfum séð í til dæmis í Covid og eins eftir hrun, sem eru hin tímabilin á síðustu árum og áratugum sem við höfum séð svona dýfur í væntingavísitölunni,“ segir Jón Bjarki. Haustið 2020 hafi heimilin til að mynda verið mjög svartsýn á stöðuna á þeim tíma en bjartsýnna að staðan myndi batna og var staðan svipuð beint eftir hrun. Í dag eru heimilin aftur á móti álíka svartsýn á stöðuna í dag og stöðuna eftir sex mánuði. Eins sé það forvitnilegt að horfa á afstöðu ólíkra hópa. „Það er alveg þekkt úr væntingakönnunum að konur eru til dæmis að jafnaði svartsýnni heldur en karlar og að tekjulægri eru að jafnaði svartsýnni heldur en þeir sem eru með hærri tekjur. En hvorug þessara reglna á við akkúrat um þessar mundir, það er álíka svartsýni meðal karla og kvenna og eins eru þeir sem eru tekjuhærri ef eitthvað svartsýnni en hinir. Það er svolítið nýtt af nálinni, þetta virðist vera nokkuð almenn og útbreidd skoðun,“ segir Jón Bjarki. Nánar er fjallað um málið í Viðskiptablaðinu . Áskrifendur geta lesið fréttina í heild hér .