Bóksalar og bókaverðir finna fyrir auknum áhuga landans á verkum Halldórs Laxness. Bókaklúbbstjóri Víðsjár segir algengt að fólk hafi þrælað sér í gegnum Sjálfstætt fólk í menntaskóla en sé nú tilbúið að reyna aftur. Guttormur Þorsteinsson, sérfræðingur á Borgarbókasafninu í Kringlunni, segist finna fyrir auknum áhuga á verkum Halldórs Laxness. „Það var náttúrulega búið að vera umræða í vetur um að hann væri ekki lesinn í menntaskólum og þarna væri menningararfur að glatast. Það lítur út fyrir að sú umræða hafi kveikt aðeins í fólki.“ Þjóðfélagsumræða um dalandi lestur á verkum Halldórs Laxness hefur glætt áhuga á verkum nóbelskáldsins. Sérfræðingur á Borgarbókasafni segir útgáfuafmæli, vinsælar leikgerðir og leshring Víðsjár auka eftirspurnina. Guttormur segir umræðu í fjölmiðlum oft leiða til fleiri útlána og þjóðskáldið sé ekki undanskilið. Salka Valka hafi rokið út í kjölfar vinsælda einleiks Unnar Aspar Stefánsdóttur sem sýndur var í Landnámssetrinu í Borgarnesi. Útgáfuafmæli verkanna veki líka athygli fólks og áhrif bókaklúbbs Víðsjár séu greinanleg. „Ég man til dæmis varla eftir því að hafa lánað út Undir Helgahnúk en nú eru bæði eintökin okkar hér í Kringlunni í útláni,“ segir Guttormur. Mikill áhugi eftir að bókaklúbburinn fór í loftið Tómas Ævar Ólafsson, rithöfundur og dagskrárgerðarmaður hjá Rás 1, segist vera dæmigerður Íslendingur þegar kemur að Laxness. Hann hafi lesið sum af þekktustu verkunum í og eftir menntaskóla. „Það er alltaf svolítill ótti hjá okkur í samfélaginu um að við séum ekki að lesa nóg, sérstaklega kannski að framhaldsskólanemendur séu ekki að lesa hann,“ bendir Tómas á. Í kjölfar umræðunnar í vetur dustaði Tómas rykið af gamalli hugmynd sem hann hafði unnið í samstarfi við Snorra Rafn Hallsson á sínum tíma um að lesa öll verk Laxness. Úr varð leshringurinn Aldrei las ég Laxness. Viðbrögðin létu ekki á sér standa. „Það er allavega rosa mikill áhugi eftir að við settum bókaklúbbinn í loftið,“ segir Tómas. „Þá streymdi svolítið til okkar fólk sem var tilbúið að vera með og byrja að lesa.“ Í kynningarefni um klúbbinn segir: „Klúbburinn Aldrei las ég Laxness er hugsaður fyrir þau sem hafa lítið kynnt sér nóbelskáldið, þau sem hafa jafnvel aldrei lesið hann, eða bara krukkað í þessari gamalkunnu menntaskólaskyldu, og/eða öll þau sem hafa áhuga á skáldskap Kiljans.“ Taka stöðuna á Laxness Ein algengasta sagan sem hann heyrir er að fólk hafi þurft að pína sig í gegnum Sjálfstætt fólk í menntaskóla og ekki haft ánægju af. Með aldrinum vakni þó áhuginn á að kynnast Nóbelskáldinu betur. „Tilgangurinn með klúbbnum er þetta stöðutékk. Er kominn tími á Laxness, þurfum við að fara að taka hann út af námskrá eða á hann ennþá erindi?“ veltir Tómas upp. Tómas segir ljóst við lestur fyrstu bóka Halldórs að sögutíminn sé orðinn fjarlægur nútímalesendum. Viðfangsefnin séu þó sígild. „Hann getur enn í dag komið manni mjög á óvart og búið til mjög sterkar tilfinningar við lesturinn,“ segir Tómas.