Síbreyti­leg skila­boð Donalds Trump Bandaríkja­for­seta um stríðið við Íran hafa valdið miklum sveiflum á mörkuðum að undan­förnu. The Wall Street Journal segir fjár­festa hafa verið keyrða á milli ólíkra sviðs­mynda á örfáum dögum, með skörpum hreyfingum í olíu, hluta­bréfum og ríkis­skulda­bréfum í kjölfarið. Markaðir hafa tekið hraðri stefnu­breytingu eftir hraðri stefnu­breytingu frá Donald Trump í átökunum við Íran. Í um­fjöllun Wall Street Journal er rakið hvernig yfir­lýsingar for­setans hafi á skömmum tíma ýmist dregið úr spennu og svo kveikt hana á ný, með beinum áhrifum á verð­myndun á fjölmörgum eigna­mörkuðum. Nýjasta dæmið var þegar Trump til­kynnti vopna­hlé, aðeins til að boða örfáum dögum síðar hafn­bannsað­gerðir á Hor­mússundi. Slík um­skipti hafa að sögn blaðsins valdið því að jafn­vel reyndir fjár­festar hafi átt erfitt með að halda áttum. Verð á framvirkum samningum með hráolíu hefur hreyfst töluvert. Wall Street Journal rifjar upp að markaðir hafi frá fyrstu árum for­setatíðar Trumps verið viðkvæmir fyrir óvæntum yfir­lýsingum hans. Þótt merki sjáist um að áhrifin af hverri ein­stakri vendingu séu ekki jafn sterk og áður, hafi síðustu vikur engu að síður ein­kennst af mikilli þreytu og tauga­spennu meðal fjár­festa. Mestu sveiflurnar hafa komið fram á olíu­markaði. Þar hafa breyttar hótanir, frestanir, vopna­hlé og hernaðar­leg skila­boð frá Hvíta húsinu ýmist þrýst olíu­verði upp eða niður. Það hefur síðan haft ólík áhrif á mis­munandi geira hluta­bréfa­markaðarins. Orkufélög hafa að jafnaði hagnast á hækkandi olíu­verði, á meðan iðnaðar­fyrir­tæki og aðrir stórir orku­not­endur hafa fremur orðið undir. Blaðið nefnir sér­stak­lega þriggja daga tíma­bil í mars þegar markaðir fóru í gegnum óvenju mikla ólgu. Á því tíma­bili lýsti Trump því fyrst yfir að Íran myndi ekki lengur ráðast á nágrannaríki sín, síðan að landið kæmi til greina til „al­gjörrar eyðingar“ og loks að Bandaríkin gætu tekið yfir Hor­mússund. Á sama tíma drógu ríki við Persaflóa úr olíu­fram­leiðslu, sem studdi enn frekar við hækkun á olíu­verði og jók vægi bandarískra orku­fram­leiðenda í augum fjár­festa. Áhrifin sáust einnig á skulda­bréfa­markaði. Fyrst um sinn hækkuðu ávöxtunar­kröfur bandarískra ríkis­skulda­bréfa sam­hliða olíu­verði, þar sem fjár­festar óttuðust að dýrari orka myndi auka verðbólgu og tor­velda bandaríska seðla­bankanum að lækka vexti. Eftir því sem leið á átökin rofnaði þetta sam­band um skeið, en tók svo aftur að myndast. Í síðustu viku féllu bæði olíu­verð og ávöxtunar­kröfur eftir að Trump boðaði tveggja vikna vopna­hlé. Á hluta­bréfa­markaði hafa hörðustu um­mælin frá for­setanum al­mennt þrýst verði niður, en þegar hann hefur dregið í land hafa hluta­bréf tekið við sér á ný. Wall Street Journal bendir þó á að viðsnúnings­dagar á mörkuðum hafi ekki verið jafn öflugir og stærstu hækkunar­dagar í tollaóvissunni í fyrra. Sumir fjár­festar hafi því dregið þá ályktun að skyn­sam­legra sé að taka ekki of stóra stöðu í kjölfar einnar fréttar, þar sem næsta vending geti verið aðeins ein sam­félags­miðlafærsla í burtu. Meginniður­staða blaðsins er sú að markaðir hafi ekki aðeins þurft að glíma við stríðsáhættu, heldur einnig sí­felldar breytingar á skila­boðum frá Trump sjálfum. Það hafi gert verð­myndun óstöðugri, aukið skammtíma­sveiflur og gert fjár­festum erfiðara fyrir að meta hvert næsta skref gæti legið.