Verðbólga er ekki á leið niður í apríl eins og áður hafði verið bundin von við. Þvert á móti spáir Haf­steinn Hauks­son, aðal­hag­fræðingur Kviku banka, að vísi­tala neyslu­verðs hækki um 1,1% í mánuðinum og að ár­s­verðbólga fari úr 5,4% í 5,5%. Í spánni segir bein­línis að „hjöðnun í apríl“ sé aflýst, og að þung mæling fyrra árs muni ekki duga til að lækka tólf mánaða takt verðbólgunnar að þessu sinni. Að mati Kviku skýrist þetta fyrst og fremst af nýrri olíu­sveiflu í kjölfar átaka við Persaflóa. Haf­steinn segir að annan mánuðinn í röð megi „einkum rekja aukna verðbólgu til hækkandi heims­markaðsverðs hráolíu“ og tengdra af­urða. Hann bendir á að áhrifin hafi orðið meiri en ella vegna þess að svo­kallað vinnsluálag hafi einnig hækkað, þannig að verð á unnum af­urðum á borð við bensín, dísil og þotu­elds­neyti hafi hækkað um­tals­vert meira en hráolían sjálf. Þetta kemur af fullum þunga inn í ís­lenska verðbólgumælingu. Sam­kvæmt spánni skýra elds­neyti og flug­far­gjöld saman­lagt 0,8 pró­sentu­stig af 1,1% hækkun vísitölunnar í apríl. Þar vegur þyngst að Kvika gerir ráð fyrir nærri 15% hækkun á dælu­verði elds­neytis í mánuðinum. Elds­neytisliðurinn einn og sér er talinn hækka vísitöluna um 0,4%, og ferðaþjónustuliðurinn, einkum vegna flug­far­gjalda, um önnur 0,4%. Haf­steinn setur þetta í skýrt sam­hengi í spánni. Þar segir að verðbólga hefði „lík­lega verið um eða undir 4,8% ef ekki hefði komið til átakanna“, þegar tekið sé til­lit til upp­safnaðra áhrifa þeirra í mars og apríl. Með öðrum orðum: Án olíu­skotsins og af­leiðinga þess á elds­neyti og flug væri verðbólgu­myndin tölu­vert hagstæðari. Á móti kemur að aðrir liðir virðast þróast hóf­legar. Kvika gerir ráð fyrir að mat­vara hækki aðeins um 0,3% í apríl og bendir á vís­bendingar úr verð­sjá ASÍ um að hægt hafi á hækkunar­takti dag­vöru­verðs eftir snarpar hækkanir fyrr á árinu. Húsnæðisliðurinn er sömu­leiðis talinn hækka um 0,3%, sem er áfram hægari taktur en áður og í samræmi við væntingar bankans um að húsnæði fari að leggja meira til hjöðnunar verðbólgu á árinu. Þrátt fyrir það dugar þessi hjöðnun í öðrum liðum ekki til að vega upp bensínið og flugið. Í spánni segir að áhrif olíu­verðs­hækkana „geri verðbólgumælingum skráveifu“ og að hækkun vísitölunnar í apríl sé langt yfir því sem al­gengt hefur verið á þessum ár­stíma. Kvika bendir á að spáin sé nærri 87. pró­senturöð aprílmælinga frá 2010 og vel yfir al­gengasta apríl­gildi síðustu fimmtán ára. Fram­haldið er þó ekki alveg jafn þungt í spá bankans. Kvika gerir ráð fyrir að verðbólga hjaðni lítil­lega næstu mánuði, einkum vegna lækkunar virðis­auka­skatts á elds­neyti í maí og grunnáhrifa í júní þegar þung mæling dettur út úr árs­grunni. Bráða­birgða­spá bankans gerir ráð fyrir 5,3% ár­s­verðbólgu í maí, 5,1% í júní og 5,2% í júlí. Haf­steinn tekur þó fram að verðbólga verði engu að síður yfir 5% fram á sumar og að „veru­leg óvissa“ ríki um fram­hald skipa­flutninga um Hor­mússund og þar með um verðbólgu­horfur til skamms tíma.