Evrópu­sam­bandið hyggst slaka veru­lega á reglum um fyrir­tækja­sam­runa í því skyni að ryðja brautina fyrir svo­kölluð „evrópsk meistara­fyrir­tæki“ sem geti betur keppt við risa­fyrir­tæki í Bandaríkjunum og Kína. Þetta kemur fram í drögum að nýjum leiðbeiningum fram­kvæmda­stjórnar Evrópu­sam­bandsins sem Financial Times hefur undir höndum. Sam­kvæmt um­fjöllun blaðsins fela drögin í sér eina stærstu stefnu­breytingu í sam­runamálum í ára­tugi. Ef breytingarnar ná fram að ganga myndu þær endur­spegla breyttan pólitískan tón í Evrópu, þar sem sí­fellt háværari kröfur hafa komið fram um að gera evrópskum fyrir­tækjum kleift að stækka og styrkjast til að mæta harðnandi alþjóð­legri sam­keppni. Í drögunum er meðal annars lögð áhersla á að vöxtur fyrir­tækja og aukin stærð geti í ákveðnum til­vikum verið sam­keppnis­hvetjandi fremur en hitt, meðal annars með því að efla nýsköpun, styrkja að­fanga­keðjur og bæta að­gang að mikilvægum aðföngum. Þessi um­ræða í Evrópu kemur upp á sama tíma og Sam­keppnis­eftir­litið hér á landi hefur nýverið tekið þveröfuga af­stöðu í einu stærsta sam­runa­máli síðustu missera. Líkt og Við­skipta­blaðið greindi frá í gærkvöldi var sam­runa­ferli Arion banka og Kviku banka blásið af eftir fund full­trúa bankanna með Sam­keppnis­eftir­litinu, þar sem ljóst var að eftir­litið myndi ekki heimila þá hag­ræðingu sem aðilar töldu felast í sam­runanum. Sam­kvæmt heimildum Við­skipta­blaðsins var það mat eftir­litsins að Kvika skipti það miklu máli fyrir sam­keppni í einka­bankaþjónustu, eignastýringu og útlána­starf­semi að ekki væri for­svaran­legt að sam­runinn gengi eftir á óbreyttum for­sendum. Þar með féll eitt stærsta sam­runa­verk­efni á ís­lenskum fjár­mála­markaði um sjálft sig áður en það komst á form­legt um­sóknar­stig. Drög fram­kvæmda­stjórnarinnar eru þó enn ekki endan­leg og geta tekið breytingum. Engu að síður benda þau til þess að grund­vallar­umræða sé hafin innan Evrópu um hvort sam­keppnis­reglur eigi ekki aðeins að verja neyt­endur til skemmri tíma heldur einnig að styðja við upp­byggingu öflugri fyrir­tækja sem geti staðið undir fjár­festingu, tækniþróun og alþjóð­legri sam­keppni til lengri tíma.