Framsóknarflokkurinn kynnti í dag tillögur um aðgerðir í efnahagsmálum. Flokkurinn leggur meðal annars til lækkun skatta á matvæli og eldsneyti tímabundið, afturköllun á hækkun skattstofns leigutekna og samræmda og fyrirsjáanlega gjaldtöku hins opinbera. Aðgerðunum er ætlað að létta undir með heimilum og draga úr kostnaðarþrýstingi, meðal annars með lægri virðisaukaskatti á matvæli sem og aðgerðum sem lækka bifreiðakostnað. Lagt er til að aðgerðirnar gildi frá 1. maí til 1. október 2026 eða fram yfir endurskoðun komandi kjarasamninga. Lilja Alfreðsdóttir formaður Framsóknarflokksins kynnti aðgerðirnar í dag ásamt Stefáni Vagni Stefánssyni varaformanni Framsóknarflokksins. „Það er nauðsynlegt að ná nýrri þjóðarsátt,“ segir Lilja. „Þetta eru sex aðgerðir og þær miða allar að því að við náum þessari sátt,“ segir hún. Þá sé óskað eftir meiri aga í stjórn á opinberum fjármálum. Þau áhrif sem Framsóknarflokkurinn telur að hljótist af tillögunum er 0,9% lægri verðbólga og að fyrirsjáanleiki í fjármálum aukist. Þá verði ávinningurinn fyrir heimili og ríkissjóð um 40 milljarðar. Kostnaður við tillögurnar er alls metinn á 13 milljarða. „Mestu máli skiptir núna að ná niður verðbólgu svo hægt sé að lækka vexti,“ segir Lilja Til þess að það sé hægt þarf mun heildstæðari nálgun og það þarf að kalla alla að borðinu, þannig að við erum að tala hér fyrir samvinnunálgun á þetta stóra, flókna og mikilvægasta viðfangsefni sem samfélagið okkar er að kljást við. Sex aðgerðir Framsóknarflokksins Samvinna og samtal – ný þjóðarsátt Samræmd og fyrirsjáanleg gjaldtaka hins opinbera Verðbólgusía – nýtt verklag í opinberum fjármálum Lægra matarverð – tímabundin lækkun skatta Lægra bensínverð – tímabundin lækkun skatta og gjalda Leigumarkaður – afturköllun hækkunar skattstofns leigutekna Daði Már Kristófersson, fjármála- og efnahagsráðherra, hefur áður sagt að lækkun á virðisaukaskatti muni hafa þveröfug áhrif á verðbólgu og að sagt að slíkt myndi hafa sömu áhrif og lækkun vaxta Seðlabankans áður en verðbólga lækkar. Slíkt gæti kynnt enn frekar undir verðbólgu en ella. Framsóknarflokkurinn leggur til að virðisaukaskattur á matvæli verði lækkaður úr 11% í 7% og telur að af því hljótist 0,5% lægri verðbólga. „Það sem við erum ósammála og erum ósátt við er að þau fara ekki í aðgerðir, þau kalla ekki fólk að borðinu fyrr en eftir dúk og disk,“ segir hún. „Þau hafa verið að kynda undir verðbólgunni með því að vera með mikil ríkisútgjöld og með því að hækka skatta og fara í gjaldskrárhækkanir sem hafa ýtt undir verðbólguna.“ Lögð er til svokölluð verðbólgusía í tillögum Framsóknarflokksins. Lilja segir að í henni felist verklag sem gangi út á það að stöðva aðgerðir ríkissjóðs og sveitarfélaga sem aukið gætu á verðbólgu. „Eða að þeim verði breytt þannig að þær styðji við verðbólgumarkmið Seðlabanka Íslands,“ segir hún.