Norska ríkisút­varpið NRK hyggst fækka um 300 til 400 stöðu­gildi á næstu fjórum árum. Vibeke Fürst Haugen, út­varps­stjóri NRK, stað­festi þetta við norska miðilinn Medi­er24 og sagði að niður­skurðurinn yrði einkum leystur með náttúru­legri starfs­manna­veltu, ströngu aðhaldi í mönnun og tíma­bundnu ráðninga­banni. Starfsmönnum var greint frá áformunum á net­fundi á þriðju­dag. Að sögn Fürst Haugen eru breytingarnar hluti af víðtækri upp­stokkun sem á að búa NRK undir framtíðina, meðal annars með fjár­festingum í nýrri tækni, húsnæði, vinnu­ferlum og hæfni­upp­byggingu starfs­fólks. Áformin fela í sér að NRK verði komið niður í um 2.700 til 2.800 starfs­menn í kringum árið 2030, sam­kvæmt norskri fjölmiðlaum­fjöllun. Í árs­reikningi NRK fyrir 2024 kemur fram að hjá félaginu hafi verið 3.249 fastráðnir árs­verk í lok þess árs. Þetta er ekki í fyrsta sinn sem stjórn­endur NRK boða fækkun starfa. Sjá einnig Nærri þriðjungur allra fjölmiðla­tekna rennur til RÚV Á fundi með menningar­málaráðu­neyti Noregs í desember 2025 kom fram að fyrir­hugað væri að draga úr mönnun um 150 árs­verk á næstu tveimur árum, einnig fyrst og fremst með náttúru­legri starfs­manna­veltu. Nýju áformin marka því fram­hald á þeirri hag­ræðingar­línu, en í stærri skala. Fréttirnar koma á sama tíma og NRK stendur í um­tals­verðum fjár­festingum og um­breytingum á rekstri sínum. Þar vegur þungt inn­leiðing nýrrar tækni og undir­búningur að nýju húsnæði, sam­hliða því sem ríkis­fjölmiðillinn reynir að laga starf­semi sína að breyttu fjölmiðla­um­hverfi og auknum kröfum um hag­kvæmni.