Kennarasambandið lýsir yfir alvarlegum áhyggjum af framgöngu Ingu Sæland, mennta- og barnamálaráðherra, í sameiginlegri ályktun. Þá hafi sambandið áhyggjur af þeim viðhorfum sem hún hafi sýnt í garð skólasamfélagsins og þeirrar fagþekkingar sem menntakerfið byggi á. Inga Sæland boðaði breytingar á einkunnakerfi í grunnskólum á þingi Kennarasambands Íslands í gær. Ráðherra sagði í ræðu sem hún hélt á þinginu að hún teldi eðlilegt að nota tölustafi í einkunnagjöf, eins og tíðkast í framhaldsskólum og háskólum, en ekki bókstafi eða önnur form sem geta verið erfið að skilja. Yfirlýsingar ráðherrans hafa mætt mikilli gagnrýni frá Kennarasambandinu. Þrír ráðherrar á rúmlega ári Í yfirlýsingunni segir að mikilvægt sé að ræða stöðu skólakerfisins af hreinskilni. „En slík umræða verður að byggja á staðreyndum, vandvirkni og raunverulegu samtali við kennara og annað fagfólk sem ber uppi skólastarf á hverjum degi,“ segir í yfirlýsingunni. Fáheyrt sé að þrír mennta- og barnamálaráðherrar hafi gegnt embættinu á rúmlega ári og að slíkt þekkist ekki í samanburðarlöndum. Þá er lögð áhersla á að aðkoma kennara og fagmenntaðs starfsfólks sé grundvallaratriði þegar innleiða eigi breytingar. Áfam tilbúin til samvinnu Annað sem þingið lýsir sérstökum áhyggjum af eru ummæli Ingu Sæland um skóla án aðgreiningar. „Ísland hefur, með lögfestingu samnings Sameinuðu þjóðanna um réttindi fatlaðs fólks, skuldbundið sig til að starfa á grundvelli réttinda fatlaðs fólks. Skóli án aðgreiningar þarf aukinn stuðning, eflingu úrræða og fleira fagfólk. Samfélagið þarf alls ekki umræðu sem ýtir undir aðgreiningu,“ segir í yfirlýsingunni. Kennarasambandið telur áskoranir menntakerfisins fjölmargar og nefnir þar breytta samfélagsgerð, skort á úrræðum, kennurum, fagmenntuðu starfsfólki, vönduðum námsgögnum og aðstöðu til verknáms. „Stjórnvöld verða að leggja traustan grunn undir metnaðarfull pólitísk markmið eigi þau að ná fram að ganga. Tryggja þarf jafnt aðgengi nemenda að námi, óháð búsetu, svo allir fái metnaðarfull tækifæri til náms þar sem hæfni þeirra, áhuga og þörfum er mætt. Aðeins þannig er raunhæft að byggja upp farsælt samfélag til framtíðar,“ segir í yfirlýsingunni. Tekið er fram að lokum að Kennarasambandið lýsir sig reiðubúið til faglegs samráðs og samvinnu við mennta- og barnamálaráðherra. Ályktun Kennarasambandsins í heild sinni Níunda þing Kennarasambands Íslands lýsir yfir alvarlegum áhyggjum af framgöngu mennta- og barnamálaráðherra og þeim viðhorfum sem hann hefur sýnt í garð skólasamfélagsins og þeirrar fagþekkingar sem menntakerfið byggir á. Mikilvægt er að ræða stöðu skólakerfisins af hreinskilni en slík umræða verður að byggja á staðreyndum, vandvirkni og raunverulegu samtali við kennara og annað fagfólk sem ber uppi skólastarf á hverjum degi. Menntamál krefjast metnaðar, stöðugleika og langtímasýnar í stefnumörkun. Undanfarið höfum við búið við alvarlegan skort á stöðugleika. Þrír mennta- og barnamálaráðherrar á rúmlega ári er fáheyrð staða og eitthvað sem þekkist ekki í samanburðarlöndum okkar. Til að innleiða breytingar eru kennarar og annað fagmenntað starfsfólk á öllum skólastigum og skólagerðum grundvallaratriði. Stefnumörkun á grundvelli popúlískra, pólitískra slagorða er hvergi líkleg til árangurs. Þingið lýsir jafnframt yfir sérstökum áhyggjum af ummælum ráðherra um skóla án aðgreiningar. Ísland hefur, með lögfestingu samnings Sameinuðu þjóðanna um réttindi fatlaðs fólks, skuldbundið sig til að starfa á grundvelli réttinda fatlaðs fólks. Skóli án aðgreiningar þarf aukinn stuðning, eflingu úrræða og fleira fagfólk. Samfélagið þarf alls ekki umræðu sem ýtir undir aðgreiningu. Áskoranir menntakerfisins eru fjölmargar. Meðal þeirra er breytt samfélagsgerð, skortur á úrræðum, kennurum og öðru fagmenntuðu starfsfólki, vönduðum námsgögnum og aðstöðu, til dæmis til verknáms. Stjórnvöld verða að leggja traustan grunn undir metnaðarfull pólitísk markmið eigi þau að ná fram að ganga. Tryggja þarf jafnt aðgengi nemenda að námi, óháð búsetu, svo allir fái metnaðarfull tækifæri til náms þar sem hæfni þeirra, áhuga og þörfum er mætt. Aðeins þannig er raunhæft að byggja upp farsælt samfélag til framtíðar. Níunda þing Kennarasambands Íslands kallar eftir breyttum vinnubrögðum, meiri vandvirkni og nýjum tóni í stefnumörkun stjórnvalda og samskiptum við skólasamfélagið og lýsir sig reiðubúið, hér eftir sem hingað til, til faglegs samráðs og samvinnu við mennta- og barnamálaráðherra.