Fjöldi starfandi hjá hinu opin­bera jókst um 1.250 milli ára í febrúar á sama tíma og starfandi utan hins opin­bera fækkaði um 910. Mest var fækkunin í ferðaþjónustu, þar sem starfandi fækkaði um 560 á milli ára. Heildarniður­staðan var því sú að störfum á ís­lenskum vinnu­markaði fjölgaði aðeins um 340 milli ára. Sam­kvæmt nýjum tölum Hag­stofu Ís­lands voru alls um 216.400 ein­staklingar starfandi á ís­lenskum vinnu­markaði í febrúar 2026. Það er fjölgun um 300 ein­stak­linga frá sama mánuði í fyrra, eða sem nemur 0,16 pró­sentum. Hag­stofan bendir jafn­framt á að um bráða­birgðatölur sé að ræða og að upp­færslur á stað­greiðslu­skrá nái jafnan nokkra mánuði aftur í tímann. Þótt heildar­breytingin sé lítil gefa sundur­liðaðar tölur skýrari mynd af þróuninni. Opin­beri vinnu­markaðurinn hélt áfram að vaxa á meðan störfum í öðrum hlutum hag­kerfisins fækkaði. Sú þróun bendir til þess að opin­beri geirinn beri áfram uppi fjölgun starfa á sama tíma og einka­geirinn sýnir meiri merki um kólnun. Það vekur einnig athygli að störfum í ferðaþjónustu hafi fækkað um 560 á milli ára. Það er um­tals­verð breyting í grein sem hefur um ára­bil verið einn helsti drif­kraftur at­vinnu­sköpunar hér á landi. Ef sú þróun heldur áfram gæti það styrkt enn frekar þá mynd að slaki sé að aukast á vinnu­markaði, einkum í út­flutnings- og þjónustu­greinum. Í til­kynningu Hag­stofunnar kemur fram að um 101.400 konur hafi verið starfandi í febrúar og um 115.000 karlar. Heildar­fjöldi starfandi jókst því aðeins lítil­lega frá fyrra ári, þrátt fyrir tals­verðar hreyfingar á milli geira.