Heimsmarkaðurinn fyrir endurnýjaðan búnað er í miklum vexti en árið 2023 var hann metinn á um 50 milljarða dala. Að sögn Gísla Þorsteinssonar, forstöðumanns notendalausna hjá OK, gera spár ráð fyrir að hann tvöfaldist fyrir árið 2030. Hann segir í samtali við Viðskiptablaðið að það sé algengur misskilningur að endurnýjaður búnaður sé gamaldags eða lúinn. „Í mörg ár var litið á endurnýttan tölvubúnað sem neyðarúrræði, eitthvað sem fyrirtæki gripu til þegar fjárhagsáætlun var sprungin eða nýr búnaður ekki fáanlegur. Sá tími er liðinn. Í dag er val á endurnýjuðum vélbúnaði merki um framsýni, rekstrarlega hagkvæmni og meðvitaða stefnu í sjálfbærni.“ Sjá einnig Myndir: Kynningarviðburður OK Gísli segir þróunina endurspegla breytt viðhorf stjórnenda þar sem aukin áhersla er lögð á að hámarka virði fjárfestinga án þess að fórna gæðum eða áreiðanleika. „Raunin er sú að eldri fyrirtækjavélar geta reynst öflugar og áreiðanlegar. Slíkar vélar eru hannaðar til að þola álag, ferðalög og daglega notkun. Þegar tæki fara í gegnum vottuð endurnýjunarferli fá fyrirtæki flott vinnutæki á broti af verði nýrra véla.“ Hann bætir við að sparnaður við að velja endurnýjaðan búnað sé að jafnaði 40-60% miðað við nýjan búnað. Með nýjum tilskipunum ESB um sjálfbærniskýrslugerð (CSRD) þurfi stærri fyrirtæki jafnframt að greina frá óbeinni losun í virðiskeðju sinni. „Rannsóknir benda til þess að allt að 80% af kolefnisfótspori tölvu verði til við framleiðslu hennar. Með því að lengja líftíma tækja og velja endurnýjaðan búnað geta fyrirtæki dregið úr kolefnislosun vegna tölvukaupa um allt að 70%. Þetta eru mælanleg áhrif sem styðja beint við sjálfbærnimarkmið fyrirtækja.“