Seðlabankinn hefur lagt áherslu á kortagreiðslur án nettengingar um nokkurt skeið. Unnið er að því að útfæra tvær leiðir fyrir kortagreiðslur án nettengingar, annars vegar með því að nota kortið sjálft, það er að segja plastkort með örgjörva, og slá inn pin númer, og hins vegar að greiða snertilaust, það er með korti í síma eða snjallúri. Kortagreiðslur án nettengingar eru hluti af aðgerðum bankans til að auka viðnámsþrótt fjármálainnviða en frekari aðgerða er að vænta á næstu misserum. Bankinn hefur til dæmis komið á fót atvikamiðstöð fjármálainnviða, en þar taka einnig þátt rekstraraðilar kerfislega mikilvægra innviða og kerfislega mikilvægir eftirlitsskyldir aðilar auk CERT-IS. Með atvikamiðstöðinni eru viðbrögð við rekstrar- og netöryggisatvikum fjármálainnviða samhæfð. Þá hefur bankinn endurskipað samstarfsvettvang um rekstraröryggi fjármálainnviða auk þess sem nýlega var gefin út netöryggisstefna fyrir fjármálakerfið. „Bankinn er einnig að hefja vinnu við áhættugreiningu í samvinnu við aðila á fjármálamarkaði og verið er að leggja mat á, í samræmi við reglur um yfirsýn með kerfislega mikilvægum innviðum sem samþykktar voru af fjármálastöðugleikanefnd í desember 2025, hvaða innviðir í fjármálakerfinu eru þess eðlis að rof í rekstri þeirra geti haft áhrif á fjármálastöðugleika,“ segir í svarinu. „Áfram er unnið að því að fjölga greiðsluleiðum hér á landi með því að koma á fót miðlægum innvið fyrir greiðslubeiðnir og vinna við að meta notkun TIPS smágreiðslukerfis Evrukerfisins fyrir millibankagreiðslumiðlun hér á landi er á lokametrunum,“ segir enn fremur, en aðgerðirnar styðji við vinnu fjármálaeftirlits bankans á grunni nýsamþykktra laga um stafrænan viðnámsþrótt á fjármálamarkaði (DORA). Seðlabankinn vinnur nú að útboði fyrir miðlægan innvið eða kerfi fyrir greiðslubeiðnir og vonir standa til að því geti verið lokið á yfirstandandi ársfjórðungi, að því er segir í svari bankans. Í ritinu Greiðslumiðlun sem Seðlabankinn gaf út síðasta sumar kom fram að umræddur innviður byggi á greiðslum milli bankareikninga og yrði bæði óháður erlendu eignarhaldi og innviðum. Með aðstoð smáforrits í síma yrði unnt að nota hinn nýja innvið til að inna af hendi greiðslur í verslunum og hjá þjónustufyrirtækjum. Nánar er fjallað um málið í Viðskiptablaðinu . Áskrifendur geta lesið fréttina í heild hér .