Reykjavíkurborg heldur áfram að stórgræða á bifreiðaeigendum eftir að gjaldskyld svæði voru stækkuð, gjaldskyldutími lengdur og gjaldskrá hækkuð. Þetta má lesa úr greinargerð með ársreikningi Reykjavíkurborgar fyrir árið 2025. Þar kemur fram að skrifstofa samgöngustjóra og borgarhönnun hafi verið 590 milljónum króna innan fjárheimilda ársins. Skýrist það einkum af afkomu Bílastæðasjóðs, sem var 560 milljónum króna innan fjárheimilda. Tekjur Bílastæðasjóðs voru 461 milljón króna umfram áætlun. Þá voru laun og launatengd gjöld 64 milljónum króna innan fjárheimilda og annar rekstrarkostnaður 34 milljónum króna innan fjárheimilda. Viðskiptablaðið greindi frá því í fyrra að borgin stórgræddi á bifreiðaeigendum eftir breytingar á gjaldskyldu í borginni. Þá höfðu tekjur Bílastæðasjóðs farið langt fram úr áætlunum. Nýjustu tölur sýna að sú þróun hélt áfram á árinu 2025. Reykjavíkurborg hefur á undanförnum árum réttlætt aukna gjaldtöku af bifreiðaeigendum með stefnu um breyttar ferðavenjur og bíllausari borg. Af ársreikningnum má þó ráða að gjaldtakan er einnig orðin veruleg tekjulind fyrir borgina. Á sama tíma og Bílastæðasjóður skilar afkomu langt umfram áætlanir er rekstur Reykjavíkurborgar í járnum. Viðskiptablaðið greindi frá því í gær að A-hluti Reykjavíkurborgar hefði verið rekinn með 5,3 milljarða króna halla á árinu 2025, samanborið við 4,7 milljarða króna afgang árið áður. Afkoman versnaði því um 10 milljarða króna milli ára. Fjárhagsáætlun hafði gert ráð fyrir 346 milljóna króna afgangi og var niðurstaðan því 5,6 milljörðum krónum verri en áætlað var. Sjá einnig Reykjavíkurborg leiðandi í verðbólgu og launaþróun Rekstrargjöld A-hluta námu 199 milljörðum króna og jukust um 13% milli ára, meðal annars vegna 9,9 milljarða króna gjaldfærslu lífeyrisskuldbindingar vegna R-deildar Brúar lífeyrissjóðs. Tekjur A-hluta jukust um 12,1 milljarð króna, eða 6,2%, en það dugði ekki til að vega upp á móti auknum útgjöldum. Sjá einnig Borgin rekin með 5,3 milljarða halla
Security News
Cybersecurity news aggregator