Sigurbergur Björnsson, fulltrúi innviðaráðuneytisins í Brussel, segist þokkalega vongóður um að stjórnvöld geti náð fram „leiðréttingu“ þegar kemur að stöðu íslenskrar flugstarfsemi í ETS viðskiptakerfinu og að tekið verði tillit til sérstakra aðstæðna landsins við yfirstandandi endurskoðun á kerfinu í Brussel. Íslensk stjórnvöld sömdu árið 2023 um tímabundna sérlausn á grunni landfræðilegrar legu sem rennur að óbreyttu út í lok árs 2026. Það fól í sér að Íslandi var veitt heimild til að úthluta gjaldfrjálsum losunarheimildum fyrir flug milli Íslands og EES svæðisins, Bretlands og Sviss. Sjá einnig „Tækifæri ís­lenskra stjórn­valda er núna“ Sigurbergur, sem lýsir í þættinum aðdragnda þess að Ísland fékk umrædda undanþágu, telur að með hagsmunagæslu á síðustu árum og með ákveðnum sérlausnum sem hafa gilt fyrir Ísland hafi Evrópusambandið viðurkennt sérstöðu Íslands sem taka beri tillit til. „Þessi hagsmunabarátta leiddi til þess að Ísland fékk eitt ríkja aðlögun á ETS-kerfinu í flugi í EES-samninginn. Aðlögunin fól í sér efnisbreytingar á gildandi ETS-regluverki sem þurfti samþykki allra aðildarríkja ESB. Því má segja að hagsmunabaráttan bar árangur því eftir þessa herferð þekktu öll aðildarríkin málstað Íslands og samþykktu aðlögunina, sem fólst í því m.a. að við gátum úthlutað fríheimildum áfram. Við þetta má segja að sérstaða Íslands var þarna viðurkennd af aðildarríkjunum. Hagsmunagæslan sem er í gangi núna snýst um að samkeppnishallinn sem kerfið leiðir til verði leiðréttur í kerfinu sjálfu. Ef það gengur ekki eftir verður leitað að sértækri aðlögun fyrir Ísland á grundvelli áðurnefndrar viðurkenningar á sérstöðu Íslands sem við náðum fram í síðustu hagsmunabaráttunni,“ sagði Sigurbergur. Sigurbergur tekur þátt í starfshóp utanríkisráðuneytisins sem á að fylgja eftir sjónarmiðum Íslands við endurskoðun á ETS kerfinu. Hann segir að tillögur Íslands lúti m.a. að því að viðurkenna sérstöðu Íslands í kerfinu sjálfu, t.d. með því að viðmiðunarvegalengdir í flugi verði minnkaðar fyrir Ísland vegna legu landsins. Sigurbergur viðurkennir þó að best færi á því að hafa eitt alþjóðlegt kerfi þegar kemur að gjaldtöku vegna loftlagsmála.