Olíu­verð hefur sveiflast töluvert síðustu daga vegna óvissu um Hormússund, eina mikilvægustu flutninga­leið olíu í heiminum. Brent-hráolía lækkaði um 2% í við­skiptum í Evrópu í morgun og fór í 99 dali á tunnu en ólíuverð hefur nú verið á niðurleið 2 daga í röð. Lækkunin kemur vegna þess að fjár­festar eru jákvæði fyrir bandarískri til­lögu um frið, sem Íranar eru sagðir hafa til skoðunar. Til­lagan felur meðal annars í sér að Íran stöðvi auðgun úrans gegn af­námi refsiað­gerða. Þá myndu báðir aðilar heimila flutninga um Hormússund. Donald Trump Bandaríkja­for­seti hefur sagt að stríðinu ljúki og Hormússund verði „opið öllum“ samþykki Teheran sam­komu­lagið, en varaði jafn­framt við því að Bandaríkin myndu hefja árásir á Íran að nýju ef sam­komu­lag næðist ekki. Markaðir í Evrópu héldu að mestu í hækkanir gærdagsins í viðskiptum morgunsins en Stoxx Europe 600 hækkaði lítil­lega í fyrstu við­skiptum eftir 2,2% hækkun í gær. Evrópsk ríkis­skulda­bréf styrktust einnig og ávöxtunar­krafa tíu ára þýskra ríkis­skulda­bréfa lækkaði lítil­lega. Í Asíu hækkaði Nikkei 225-vísi­talan í Japan mest og rauk upp um tæp 6%. Fram­virkir samningar bentu til lítils­háttar hækkunar á S&P 500 við opnun markaða í Bandaríkjunum.