Olíu­verð rauk upp fyrir 100 dali á tunnu og hluta­bréfa­markaðir í Evrópu tóku dýfu eftir að átökin í Miðaustur­löndum hörðnuðu enn á ný. Kveikjan var sú að Bandaríkja­stjórn boðaði að­gerðir gegn siglingum til og frá írönskum höfnum um Hormuz-sund, en stjórn­völd í Teheran brugðust við með hótunum um gagn­ráð­stafanir gegn höfnum við Persaflóa. Fram kemur í um­fjöllun Financial Times að að­gerðir Bandaríkjanna eigi að beinast að skipa­um­ferð sem tengist Íran, en ekki siglingum milli annarra hafna á svæðinu. Þrátt fyrir það brugðust markaðir skarpt við, enda er Hor­mússund ein mikilvægasta sam­gönguæð heims fyrir olíu- og gas­flutninga. Brent-hráolía fór yfir 102 dali tunnan og jókst þar með enn á ný ótti á mörkuðum við að orku­kostnaður hækki hratt, verðbólga taki við sér og efna­hags­horfur versni. Sam­evrópska vísi­talan Stoxx Europe 600 lækkaði um 0,8 pró­sent í fyrstu við­skiptum og FTSE 100-vísi­talan í London um 0,7 pró­sent. Þá lækkuðu einnig hluta­bréf í Asíu og verð á fram­virkum samningum á bandarískum mörkuðum lækkar. Grein­endur Deutsche Bank segja við FT að sú bjartsýni sem kviknað hefði í kjölfar tíma­bundins vopna­hlés í síðustu viku sé nú að mestu horfin. Hækkun olíu­verðs hefði aftur vakið áhyggjur af því að hag­vöxtur veikist á sama tíma og verðbólga reynist þrálát. Íranir hafa á móti hert tóninn og sagt að öryggi hafnar­borga við Persaflóa og Óman­flóa verði annaðhvort tryggt öllum eða engum. Jafn­framt hefur því verið lýst yfir að skip tengd „óvininum“ muni ekki fá að fara um sundið. Um­mælin hafa aukið enn frekar ótta við að átökin breiðist út og raski alþjóð­legum vöru­flutningum. Alþjóða­siglinga­mála­stofnunin, IMO, sagði þróunina í Hormuz-sundi vera mikið áhyggju­efni og hvatti til þess að tryggt yrði á ný óhindrað flæði skipa um svæðið í samræmi við alþjóð­legar reglur um siglinga­frelsi. Þá vinnur stofnunin jafn­framt að því með írönskum stjórn­völdum að opna mannúðar­leið svo koma megi sjóliðum út af svæðinu. Kín­versk stjórn­völd hafa kallað eftir óhindruðum siglingum um sundið og lýst sig reiðu­búin til að stuðla að lausn málsins. Frakk­land og Bret­land hyggjast sömu­leiðis ræða á næstu dögum mögu­lega fjölþjóð­lega að­gerð sem ætlað væri að tryggja örugga og frið­sam­lega um­ferð um þessa lykil­leið heims­hag­kerfisins. Keir Star­mer for­sætis­ráðherra Bret­lands sagðist ekki styðja fyrir­hugaðar að­gerðir Bandaríkjanna, þótt Bretar myndu áfram leggja áherslu á frelsi siglinga á svæðinu. Fri­edrich Merz kanslari Þýska­lands sagði jafn­framt að áhrifa stríðsins myndi gæta um langt skeið í evrópskum hag­kerfum og kynnti mót­vægisað­gerðir til að draga úr áhrifum hærra elds­neytis­verðs á al­menning og fyrir­tæki. Óvissan hefur einnig sett mark sitt á skulda­bréfa­markaði. Ávöxtunar­krafa ríkis­skulda­bréfa hefur hækkað víða þar sem fjár­festar óttast lang­vinnari átök og þrálátari verðbólguþrýsting. Þróunin sýnir enn á ný hversu viðkvæmt alþjóða­hag­kerfið er fyrir truflunum á orku­flutningum frá Persaflóa­svæðinu. Dragist ástandið á langinn gæti það þrýst olíu­verði enn hærra, aukið verðbólgu í Evrópu og Bandaríkjunum og dregið enn frekar úr áhuga fjár­festa á hluta­bréfa­mörkuðum.