Verð á Brent-hráolíu rauk upp fyrir 100 dali tunnan í morgun og fór um tíma í kringum 119 dali, eftir því sem áhyggjur jukust af truflunum á olíu­fram­boði vegna stríðsá­taka í Mið-Austur­löndum. Sam­hliða lækkuðu hluta­bréf á mörkuðum í Evrópu og Asíu og ávöxtunar­kröfur ríkis­skulda­bréfa urðu undir þrýstingi. Bandaríkja­dalur styrktist einnig þegar fjár­festar leituðu í öruggari eignir. Hækkunin mildaðist síðar þegar fram kom að fjár­málaráðherrar G7-ríkjanna hygðust halda neyðar­fund þar sem rætt yrði um sam­eigin­lega út­tekt úr neyðarolíu­birgðum, í sam­starfi við Alþjóð­legu orkumála­stofnunina (IEA). Financial Times greinir frá því að Bandaríkin og að minnsta kosti tvö önnur G7-ríki hafi lýst stuðningi við slíka að­gerð og að um­ræða hafi verið uppi um út­tekt á bilinu 300–400 milljónir tunna úr sam­eigin­legum birgðum IEA-ríkja. Brent-hráolían stendur í um 107 dölum á tunnu þegar þetta var skrifað, eftir um 15% hækkun. Í Evrópu lækkuðu helstu vísitölur strax við opnun. Stoxx Europe 600 var niður um 1,4%, FTSE 100 í London lækkaði um 1,3% og DAX í Þýska­landi féll mest, eða um 2,5%. Markaðsaðilar lýstu því í morgun að olíu­verðið væri orðið „ráðandi breyta“ í verðlagningu á öðrum eigna­flokkum og að fyrir­sagnir væru metnar út frá því hvaða áhrif þær hefðu á olíu­verðið. Í Asíu voru viðbrögðin enn verri. Kospi í Suður-Kóreu féll um 6%, Topix í Japan um 3,8% og Taiex í Taí­van um 4,4%. Hang Seng í Hong Kong lækkaði um 1,9% og CSI 300 á megin­landi Kína um 1%. Hækkandi olíu­verð setur mikinn þrýsting á asísku markaðina, sér­stak­lega í ríkjum sem reiða sig á inn­flutta orku. Vextir Evrópuríkja hækka Á skulda­bréfa­mörkuðum hélt út­sala áfram og ávöxtunar­kröfur hækkuðu. Í Bret­landi hækkaði ávöxtunar­krafa 10 ára ríkis­bréfa um 0,11 pró­sentu­stig í 4,73% og krafan á 2 ára bréf hækkaði um 0,19 pró­sentu­stig í 4,06%. Ávöxtunar­krafa 10 ára þýskra Bund hækkaði um 0,05 pró­sentu­stig í 2,92%. Þessi þróun endur­speglar að markaðir eru að endur­meta líkur á vaxtalækkunum: hærra olíu­verð eykur líkur á þrálátari verðbólgu og getur þar með þrengt svigrúm seðla­banka til að lækka vexti. Bandaríkja­dalur hélt áfram að styrkjast. Evran fór snemma dags í lægsta gildi frá nóvembermánuði áður en hún jafnaði sig lítil­lega en var samt um 0,6% lægri gagn­vart dalnum, í kringum 1,156. Sterlings­pundið var einnig um 0,6% lægra. Í Asíu veiktist kóreski woninn um 0,7% í 1.491,6 á dollar og jen veiktist um 0,4% í 158,5 á dollar. Áhrifin tengjast ekki aðeins verðbólguótta heldur einnig raun­veru­legri fram­boðsáhættu. Bahrain Petroleum Company (Bapco) lýsti yfir force majeure á starf­semi sinni eftir árás á hreinsunar­stöð félagsins, sem undir­strikar að truflanir eru ekki lengur ein­göngu fræði­legar í augum markaða. Á sama tíma berast fréttir um áfram­haldandi loftárásir og pólitíska þróun í Íran, sem eykur óvissu um hvort átökin dragist á langinn. Það sem markaðir fylgjast nú helst með er hvort olíu­fram­boð skerðist varan­lega.