Olíu­verð hækkaði snögg­lega í fyrstu við­skiptum í morgun eftir að Íran hótaði gagn­ráðstöfunum vegna hald­lagningar Bandaríkja­manna á írönsku flutninga­skipi og vonir um skjótan friðar­samning milli ríkjanna dvínuðu. Brent-hráolía hækkaði um meira en 5 pró­sent og fór upp í 95 dali tunnan. Hækkunin kemur eftir snarpa lækkun á föstu­dag, þegar markaðir höfðu bundið vonir við að hægt yrði að ná sam­komu­lagi milli Was­hington og Teheran. Þær væntingar hafa hins vegar veikst á ný eftir að bandarískur tundur­spillir lagði hald íranskt skip sem hluta af hafn­banni Bandaríkjanna. Íran sagði í kjölfarið að gagn­ráð­stafana væri að vænta „innan skamms“. At­vikið átti sér stað á sama tíma og óvissa ríkir um hvort friðar­viðræður milli Bandaríkjanna og Írans fari fram í Pakistan síðar í vikunni. Donald Trump sagði á sunnu­dag að bandarísk sendi­nefnd yrði send til Pakistan á mánu­dag til viðræðna. Írönsk stjórn­völd sögðu hins vegar að ekki hefði verið tekin ákvörðun um hvort þau myndu taka þátt. Óvissan hafði einnig áhrif á aðra markaði. Evrópsk hluta­bréf lækkuðu við opnun og Stoxx 600-vísi­talan r niður um 1 pró­sent. Í Bandaríkjunum bentu fram­virkir samningar til lækkunar á hluta­bréfa­markaði, þar sem S&P 500-vísi­talan var sögð stefna á um 0,7 pró­senta lækkun við opnun. Vísi­talan hafði hækkað um meira en 4 pró­sent í síðustu viku á væntingum um friðar­sam­komu­lag. Á skulda­bréfa­markaði hækkaði ávöxtunar­krafa á 10 ára ríkis­skulda­bréfum Bandaríkjanna um 0,03 pró­sentu­stig í 4,27 pró­sent. Sam­kvæmt FT eru markaðir því komnir aftur í varnar­stöðu eftir að bjartsýni síðustu daga dalaði. Mohit Kumar, aðal­hag­fræðingur Jef­feries í Evrópu, sagði að markaðir væru í „risk-off“ ham í morgun eftir að spennan hefði aukist, þótt hann teldi enn að þróunin stefndi að sam­komu­lagi. Írönsk stjórn­völd lýstu hald­lagningunni sem aug­ljósri árás á íranska flutninga­skipið Touska á Óman­hafi. Tals­maður íranska hersins sagði að her­aflinn væri til­búinn til að svara með af­gerandi hæti, en hefði hingað til haldið aftur af sér vegna þess að fjöl­skyldu­meðlimir áhafnarinnar væru um borð. Hann sagði að þegar fullt öryggi áhafnar og fjöl­skyldna þeirra yrði tryggt myndi Íran grípa til „nauð­syn­legra“ að­gerða. Sam­hliða þessu hélt óvissan áfram um mögu­legan samning. Tals­maður utan­ríkis­ráðu­neytis Írans sagði að að­gerðir Bandaríkjanna, meðal annars hafn­arbann á írönsk skip og hafnir, sýndu að Was­hington væri ekki al­vara í diplómatískri nálgun sinni. Hann bætti við að af­hending auðgaðs úrans til Bandaríkjanna eða annars ríkis hefði aldrei komið til greina af hálfu Írans. Það sem virðist nú knýja olíu­markaðinn er því ekki aðeins hernaðar­leg stig­mögnun sem slík, heldur einnig sú stað­reynd að vonir um skjótan friðar­samning hafa dofnað. Fjár­festar eru aftur farnir að verð­leggja aukna áhættu á frekari átökum og óvissu um fram­hald viðræðna, sem skýrir skarpa hækkun olíu­verðs í morgun.