Dæmi­gerður Dani mun í framtíðinni greiða um eina milljón danskra króna í skatt af ávöxtun líf­eyris­sparnaðar yfir starfsævina, sam­kvæmt nýrri greiningu dönsku sam­takanna For­si­kring & Pension. Danski líf­eyris- og trygginga­geirinn vill nú að svo­nefndur PAL-skattur verði tekinn inn í viðræður um nýjan stjórnarsátt­mála í Dan­mörku. Skatturinn er 15,3% ár­legur skattur á ávöxtun flestra líf­eyris­eigna Dana og er greiddur sjálf­krafa af líf­eyris­sjóðum og fjár­mála­fyrir­tækjum. Børsen greinir frá þessu. Sam­kvæmt greiningu For­si­kring & Pension er dæmi­gerður launa­maður sem fer á eftir­laun í dag með um 2 milljónir danskra króna í líf­eyris­eign. Án PAL-skattsins væri sú eign um 2,5 milljónir danskra króna, sam­kvæmt samtökunum. Áhrifin verða meiri til framtíðar, þar sem margir sem fara nú á eftir­laun hafa ekki greitt skattinn allan sparnaðartímann. PAL-skatturinn var fyrst tekinn upp í kringum alda­mótin. For­si­kring & Pension áætlar að meðal-Dani muni í framtíðinni greiða um eina milljón danskra króna í skatt af ávöxtun líf­eyris­sparnaðar yfir starfsævina. „Flestir Danir greiða skatt af líf­eyris­greiðslum þegar þeir komast á eftir­launa­aldur. En það er langt frá því að vera allur reikningurinn, því fólk greiðir einnig skatt af ávöxtun líf­eyris­sparnaðar á hverju ári og það safnast upp í mjög háar fjár­hæðir yfir ævina,“ segir Kent Dams­ga­ard, fram­kvæmda­stjóri For­si­kring & Pension, við Børsen. PAL-skatturinn leggst á ár­lega ávöxtun líf­eyris­sparnaðar, svo sem vexti, arð og gengis­hagnað. Bankar og líf­eyris­félög reikna skattinn, skila upp­lýsingum og greiða hann sjálf­krafa til danskra skatt­yfir­valda. Sam­kvæmt Børsen skilaði skatturinn 46 milljörðum danskra króna í ríkis­sjóð árið 2025. Dams­ga­ard segir skattinn vera einn þann veiga­mesta en jafn­framt minnst rædda skatt sem venju­legir Danir greiða. „Þegar horft er á tölurnar yfir heila ævi verður ljóst að PAL-skatturinn er einn mikilvægasti og minnst ræddi skatturinn fyrir al­menna Dani,“ segir hann. For­si­kring & Pension vill að skatt­lagning líf­eyris­sparnaðar verði rædd sam­hliða um­ræðu um fjár­magns­tekju­skatt og skatta á fjár­magn, meðal annars eftir að Modera­ter­ne lögðu til í kosninga­baráttunni að lækka fjár­magns­skatta. „Þegar rætt er um fjár­magns­tekjur ætti að sjálfsögðu einnig að ræða skatt­lagningu líf­eyris til að tryggja sann­gjarnt jafn­vægi fyrir alla Dani, þar sem það borgar sig alltaf að spara til eftir­launa,“ segir Dams­ga­ard. Pólitískur áhugi á að lækka PAL-skattinn hefur þó verið tak­markaður. Børsen rifjar upp að síðast þegar skatturinn var ræddur á danska þinginu, haustið 2024, lagði óháði þing­maðurinn Mike Fon­se­ca til að lækka hann um tvö pró­sentu­stig. Aðeins tveir þing­menn greiddu at­kvæði með til­lögunni. Frederik I. Peder­sen, aðal­hag­fræðingur 3F, hefur árum saman bent á að tekjur ríkisins af PAL-skattinum hafi reynst mun meiri en ríkis­stjórnir hafi gert ráð fyrir. Hann telur þó ekki sjálf­gefið að skatturinn eigi að lækka. Hann bendir á að líf­eyris­nefndin í Dan­mörku hafi árið 2022 komist að þeirri niður­stöðu að fyrri um­bætur hefðu tryggt flestum launa­mönnum góða hvata til líf­eyris­sparnaðar. Þá yrði lækkun PAL-skattsins dýr fyrir ríkis­sjóð. „Þetta mun tæma ríkis­sjóð. Að lækka PAL-skattinn um aðeins eitt pró­sentu­stig kostar um 2,25 milljarða danskra króna,“ segir Frederik I. Peder­sen við Børsen. Hann segir að slíkur kostnaður þyrfti að greiðast með niður­skurði, skatta­hækkunum eða nýjum og erfiðum um­bótum. Þá myndi lægri PAL-skattur einkum gagnast þeim sem eiga stærstu líf­eyris­eignirnar. „Fyrir tekju­háa hópa er lækkun PAL-skattsins aug­ljós­lega jákvæð. Fyrir tekjulægri hópa getur hún hins vegar þýtt meiri skerðingu á opin­berum líf­eyri. Al­menn lækkun hefur því ekki sömu áhrif á alla,“ segir Peder­sen.