Vonir standa til þess að stjórnvöld í Íran og Bandaríkjunum komist að samkomulagi, jafnvel strax í dag, um að ljúka stríðinu sem hófst með loftárásum Bandaríkjanna og Ísraels á Íran 28. febrúar. Samningamenn ríkjanna hafa unnið að því að skrifa texta samkomulags sem bindi enda á stríðsátök og yrði til að opna fyrir umferð skipa um Hormússund. Donald Trump, forseti Bandaríkjanna, sagði í gær að þokast hefði í samkomulagsátt og hótaði frekari árásum ef samningar næðust ekki. Hann hefur reyndar áður gefið frá sér álíka yfirlýsingar án þess að úr þeim rættist. Marco Rubio, utanríkisráðherra Bandaríkjanna, sagði í dag að það væri möguleiki á því að góðar fréttir bærust á næstu klukkustundum. Rubio sagði að samkomulagið sem nú er í vinnslu myndi marka upphaf að ferli þar sem „heimurinn þarf ekki lengur að óttast eða hafa áhyggjur af írönskum kjarnorkuvopnum“. Enn ríkir mikil óvissa um hvað felst í því samkomulagi sem unnið er að. Bandaríski fréttavefurinn Axios hefur eftir þarlendum embættismanni að helstu efnisatriði samkomulagsins sem unnið er að séu þessi: Framlenging vopnahlés um 60 daga Opnun Hormússunds meðan vopnahléið er í gildi Íranar fá að selja olíu án takmarkana og ýmsum viðskiptaþvingunum er aflétt Viðræðum verður haldið áfram um kjarnorkuáætlun og -vopn Írana AFP-fréttastofan hafði eftir írönskum embættismönnum að umræðum um kjarnorkuvopn yrði seinkað um 60 daga eftir að samningur tækist. Fars-fréttastofan í Íran sagði að Bandaríkjastjórn hefði samþykkt að losa um hluta íranskra fjármuna sem hafa verið frystir erlendis vegna alþjóðlegra viðskiptaþvingana gegn ríkinu. Um leið yrði hafnbanni á Íran aflétt. Íranar myndu í skiptum fyrir þetta leyfa umferð flutningaskipa um Hormússund. Ursula von der Leyen, forseti framkvæmdastjórnar Evrópusambandsins, fagnaði því að gangur væri í viðræðum Írana og Bandaríkjamanna. Hún sagði nauðsynlegt að draga úr átökum, opna Hormússund og tryggja fullt siglingafrelsi. Auk þess yrði að tryggja að Íranar fengju ekki að framleiða kjarnorkuvopn.