Daði Már Kristófersson, fjármála- og efnahagsráðherra, segir það raunhæft markmið að ná hallalausum fjárlögum árið 2027, þrátt fyrir ófyrirséð áhrif á efnahagskerfið. Bergsteinn Sigurðsson dagskrárgerðarmaður Ríkisútvarpsins spurði Daða Má út í væntingar til fjárlaga næsta árs í Silfrinu í kvöld. Hagtölurnar eru ekki að þróast á eins jákvæðan hátt og þið hefðuð vonað í upphafi kjörtímabilsins. Það kemur auðvitað ýmislegt inn í. Það eru áföll á Grundartanga, það er óvissa á alþjóðavettvangi og fleira. Þið stefnduð á hallalaus fjárlög 2027. Er það raunhæft? „Já og ég verð að viðurkenna að ég er ekki fyllilega sammála samantektinni þinni. Það er raunar bara einn mælikvarði, kannski tveir, sem er ekki að stefna eins og við hefðum viljað. Annars vegar verðbólga, sem er meiri en ég hefði viljað sjá, og hins vegar er auðvitað áhyggjuefni hver þróunin er á vinnumarkaði,“ svarar Daði Már. Hann segir vinnumarkaðinn hafa verið að gefa eftir. Staðan fari að vísu mjög eftir bakgrunni og að atvinnuleysi sé fyrst og fremst meðal fólks með annan bakgrunn en íslenskan. „Hissa og glaður yfir því hvað íslenska hagkerfið er ótrúlega stöðugt“ „Þegar að menn tala síðan um hagtölur almennt að þá er það þannig að hagvöxtur á Íslandi er ennþá sterkur. Hann er spáður meiri á þessu ári heldur en á síðasta ári og það er að gerast á sama tíma og sú mikla fjölgun, sem hefur viðhaldið hagvextinum á Íslandi núna um nokkurt skeið, hefur verið að minnka,“ segir Daði Már. Vissulega hafi sést töluvert góðar hagvaxtatölur á Íslandi en hagvöxtur á mann hafi verið mjög lítill og alls ekki sambærilegur við nágrannalönd okkar. „Það er núna að snúast við. Það er stefna þessarar ríkisstjórnar, sem meðal annars kemur fram í atvinnustefnunni, að byrja einmitt að stuðla að betri hagvexti. Hagvexti sem að lyftir upp verðmætasköpuninni í samfélaginu. Vegna þess að hagvöxtur sem er drifinn áfram af fólksfjölgun gengur auðvitað á innviðina okkar.“ Þessir viðbótareinstaklingar þurfi skólavist, noti samgöngumannvirki og heilbrigðiskerfið. „Ef að við sjáum ekki aukningu í landsframleiðslu á mann þá þýðir það að álagið á kerfinu okkar er að aukast án þess að við séum að sjá tekjuaukningu sem að stendur undir því. Þannig að ég tek raunar alls ekki undir það að hagþróunin hafi verið hagfelld. Þvert á móti er ég, eins og svo sem margir af kollegum mínum hér, eiginlega bara hissa og glaður yfir því hvað íslenska hagkerfið er ótrúlega stöðugt og duglegt að standa af sér áföll,“ segir Daði Már. Fjármála- og efnahagsráðherra segir ríkisstjórnina stefna að „betri hagvexti“. Hann bendir á að meiri hagvexti sé spáð á þessu ári en því síðasta þrátt fyrir að dregið hafi úr fólksfjölgun hérlendis.