Sólveig Anna Jónsdóttir, formaður Eflingar, segir Reykjavíkurleiðina í leikskólamálum vera gott fyrsta skref til að bæta aðstæður starfsfólks og barna en hefur áhyggjur af því að breytingarnar gangi ekki nægilega langt. Aðstæður hafi lengi verið óviðunandi. „Við erum tilbúin til að skoða þetta með jákvæðum huga, í þeirri von að ef ástandið batnar ekki þá verði einfaldlega gripið til fleiri aðgerða til að bæta aðstæðurnar inni á leikskólunum,“ segir Sólveig Anna. Reykjavíkurleiðin í leikskólamálum var samþykkt í borgarstjórn í gær. Breytingarnar fela meðal annars í sér umtalsverðar breytingar á gjaldskrá. Boðið verður upp á 36 tíma gjaldfrjálsa vistun en eftir það bætist við stighækkandi verð fyrir lengri dvöl. Afsláttur verður fyrir einstæða foreldra og efnaminni fjölskyldur. „Tekjuviðmiðin virðast okkur vera fremur jákvæð. Við höfum vissulega áhyggjur af því að ekki sé gengið nógu langt til að ná fram þeim árangri að fleiri stytti vistunartíma barnanna sinna, en þarna er verið að stíga mikilvægt skref til að bæta aðstæður starfsfólksins á leikskólanum,“ segir Sólveig Anna. „Ég er í það minnsta ánægð með að Reykjavíkurborg hafi loksins ákveðið að hefja þá vegferð að breyta þessu módeli vegna þess að ef borgin hefði ekki gert það þá hefði hún verið að sýna mjög mikið ábyrgðarleysi þegar kemur að rekstri leikskólanna eins og hún hefur því miður komist upp með að gera síðustu ár.“ Búa þurfi til hvata til að tryggja að færri börn séu með langan vistunartíma til þess að draga úr álagi. Fyrirsjáanleiki sé lykilatriði fyrir foreldra sem geti ekki stokkið til og sótt börnin sín þegar grípa þurfi til fáliðunar á leikskólum með skömmum fyrirvara. „Það er miklu betra fyrir fólk sem á erfitt með að komast frá vinnu sinni vegna þess að þau eru í stöðu, sem býður ekki upp á að þau geti ekki bara labbað út að fá að vita með góðum fyrirvara hvenær vistun barna er styttri heldur en að fá þetta símtal óforvarandis.“ Sonja Ýr Þorbergsdóttir, formaður BSRB, sagði í gær að breytingarnar bitnuðu verst á foreldrum í ósveigjanlegum störfum eða þeim sem eigi lítið bakland og ýttu undir stéttaskiptingu. Halla Gunnarsdóttir, formaður VR, sagði að álögur á fullvinnandi foreldra séu auknar og þjónusta skert. Sólveig Anna segir gagnrýnina vera ómálefnalega. „Það hefur verið máluð upp eins svört mynd og hægt er að hugsa sér. Látið eins og það sé verið að reiða til höggs gagnvart konum og fólki í erfiðri stöðu. Það sem er áhugavert í málflutningi þessa fólks er að þau minnast aldrei á starfsfólk leikskólanna,“ segir Sólveig Anna. Hún segir brýnt að bæta starfsaðstæður til að auka áhuga á störfum í leikskólum Reykjavíkur. „Starfsmannaveltan, eins og hún birtist okkur, er svo mikil að hún er auðvitað skýr vísbending um að aðstæður inni á leikskólanum séu ekki til þess fallnar að ná að halda í gott starfsfólk. Það er auðvitað auðvelt fyrir fólk að sitja á skrifstofunni sinni og halda því fram að það eina sem þurfi að gera sé að ráða fleira starfsfólk. En maður hefði haldið að fólk sem vill láta taka sig alvarlega þegar kemur að málefnum vinnandi fólks myndi kannski fyrst og fremst vilja horfast í augu við raunveruleikann og koma svo með lausnir sem miða við hann.“