Algjör samhljómur var með þingmönnum um nauðsyn þess að berjast gegn glæpagengjum þegar þeir ræddu skýrslu ríkislögreglustjóra um skipulagða glæpastarfsemi. Þingmenn sem tóku þátt í sérstakri umræðu um skýrsluna, að beiðni Karls Gauta Hjaltasonar, þingmanns Miðflokksins, voru sammála um að mikil ógn stafaði af skipulagðri glæpastarfsemi og að nauðsynlegt væri að bregðast við henni. Viðbragða þörf Karl Gauti, hóf umræðuna á því að lesa upp úr skýrslu greiningardeildar ríkislögreglustjóra þar sem mátti heyra viðvaranir um aukna viðveru starfsemi erlendra skipulagðra glæpahópa. Það var ekki fyrr en að loknum upplestri sem hann sagði að þetta væri úr skýrslu frá 2008. Síðan hefðu komið út margar skýrslur þar sem varað væri við skipulagðri glæpastarfsemi og erlendum glæpahópum fjölgað úr fimm í tuttugu. „Hér verður að bregðast við,“ sagði Karl Gauti og kvað nauðsynlegt að færa lögreglu allar þær heimildir sem væru nauðsynlegar. Vill sækja að glæpagengjum úr öllum áttum Þorbjörg Sigríður Gunnlaugsdóttir dómsmálaráðherra kvaðst hjartanlega sammála Karli og sagðist hafa verið að bregðast við og ráðast að og þrengja að skipulögðum glæpahópum í heilt ár. Hún sagði nýjustu greininguna vera hryggjarstykkið í stefnu stjórnvalda um að berjast gegn skipulagðri glæpastarfsemi. Hún sagði að sækja þyrfti að glæpahópum úr öllum áttum. Dómsmálaráðherra sagði að umfangsmikill aðgerðapakki væri í vinnslu í dómsmálaráðuneytinu til að leggja til atlögu gegn skipulagðri brotastarfsemi. Hún sagði brottvísun glæpamanna beitt í auknum mæli af EES-svæðinu. „Við verðum að vera staðföst. Við getum ekki leyft okkur að vera hikandi.“ Ekki fjarlæg eða fræðileg ógn Guðrún Hafsteinsdóttir, formaður Sjálfstæðisflokksins og fyrrverandi dómsmálaráðherra, sagði nýja skýrslu greiningardeildar lögreglu sýna að skipuleg glæpastarfsemi væri ekki lengur fjarlæg eða fræðileg ógn. Hún sagði glæpagengi sjá augljósan kost á að byggja starfsemi sína upp hér. Hún sagði mestu skipta að brjóta upp rekstrargrundvöll glæpahópa, með því að taka gróðann af hópunum væri grafið undan þeim. Víðir Reynisson, þingmaður Samfylkingarinnar, sagði að alvarlegt ástand í þessum efnum en færi versnandi. Hann fagnaði aðgerðum dómsmálaráðherra til að bregðast við því. Víðir lagði áherslu á alþjóðlegt samstarf lögreglu sem hann sagði skila miklu í baráttunni gegn skipulagðri glæpastarfsemi. Hann sagði að best væri að ná utan um glæpastarfsemi með þverfaglegri samvinnu. „Við þurfum að vera skipulagðari og agaðri heldur en glæpahóparnir og þannig náum við bestum árangri.“ Aukið fjármagn og auknar heimildir Stefán Vagn Stefánsson, varaformaður Framsóknarflokksins, sagði að skipulögð glæpastarfsemi væri raunveruleg ógn við samfélagið. Hún hefði því miður farið vaxandi síðustu árin og spáð væri áframhaldandi vexti hennar. „Við munum sjá þetta aukast enn frekar ef ekkert verður að gert.“ Lögregla þarf aukið fjármagn og auknar heimildir til að bregðast við, sagði Stefán Vagn. Sigurjón Þórðarson, þingmaður Flokks fólksins, sagði að barátta gegn skipulögðum glæpum væri að skila árangri og vísaði til handtöku ellefu manna á Íslandi nýlega í samevrópskum aðgerðum. Hann sagði að efla þyrfti og treysta landamærin. Nýsett lög um að hægt sé að afturkalla vernd er dæmi um mál sem gagnast í baráttunni gegn glæpum sagði Sigurjón; þannig væri hægt að losna við fólk af landinu sem bryti af sér. Sigríður Á. Andersen, þingmaður Miðflokksins og fyrrverandi dómsmálaráðherra, sagði engan þurfa að velkjast í vafa um að þverpólitísk sátt væri um að berjast gegn skipulagðri glæpastarfsemi. Þetta ætti bæði við inni í þinginu og í samfélaginu. Gera þarf ávinninginn upptækan Grímur Grímsson, þingmaður Samfylkingarinnar, sagði allar stofnanir sem koma nærri baráttu gegn skipulagðri glæpastarfsemi leggja áherslu á að gera ávinning af glæpastarfsemi upptækan. Hann, líkt og dómsmálaráðherra, gerði að umtalsefni að hluti þingflokks Miðflokksins hefði setið hjá við afgreiðslu lagafrumvarps um slíkt. Það gerðu Karl Gauti og Sigríður athugasemd við. Innihaldslaust tal ráðherra Jón Gunnarsson, þingmaður Sjálfstæðisflokksins og fyrrverandi dómsmálaráðherra, sagði að ákveðin þöggun hefði verið á þessum vettvangi. Hann sagði það hryggja sig að heyra aðeins frá ríkisstjórninni að verið væri að móta nýja stefnu og undirbúa aðgerðapakka. Hann sagði lögregluna ekki þurfa slíkt því hún vissi hvað þyrfti að gera. Jón sagði óvíst hvort loforð um fjölgun lögreglumanna á síðasta ári hefði orðið að veruleika en að í valdatíð Sjálfstæðisflokksins hefði lögreglumönnum verið fjölgað um 70 til 80. Hann lýsti upptalningu ráðherra á aðgerðum sem innihaldslausri. Mikilvægi tollgæslu og alþjóðlegs samstarfs Stefán Þór Eysteinsson, varaþingmaður Samfylkingarinnar, sagði mikilvægt að tollayfirvöld hafi yfir að ráða búnaði og tæknilegri getu til að fylgjast með smygli. Hann sagði vísbendingar um að gegnumlýsingarbúnaður væri kominn til ára sinna. Kolbrún Baldursdóttir, þingmaður Flokks fólksins, sagði að vaxandi skipulögð glæpastarsemi á netinu krefðist nýstárlegra aðferða og alþjóðlegs samstarfs. Hún sagði erfitt að vita til þess að glæpamenn herjuðu í vaxandi mæli á börn og fólk í viðkvæmri stöðu. Hún sagði nauðsynlegt að byggja upp traust og samvinnu milli þjóða til að brjóta upp þennan óhugnað. Viðbrögð við hryðjuverkamönnum Karl Gauti Hjaltason sagði undir lokin að umræðan hefði verið gagnleg. Hann spurði ráðherra sérstaklega hvort hér gætu verið menn sem tengdust hryðjuverkum og hvað stjórnvöld gætu gert og gerðu tli að koma í veg fyrir slíkt. Hann vísaði til brottflutnings manns sem hér var en hafði tengst hryðjuverkum erlendis. Dómsmálaráðherra sagði að alþjóðleg samskipti, rannsóknir og eftirlit hefðu verið forsenda þess að uppgötvaðist um búsetu manns hér á landi sem tengdist hryðjuverkum. Hún sagði frumvarp sitt um sterkara eftirlit í gegnum Scenghen gríðarlega mikilvægt í þessum efnum. Allir nema tveir þingmenn sem tóku þátt í umræðunni hafa gegnt embætti dómsmálaráðherra eða verið lögreglumenn.