Bráðabirgðaákvæði í lögum um sveitarstjórnarkosningar vegna kosninga í Grindavík hefur verið samþykkt á Alþingi. Ákvæðið gefur þeim Grindvíkingum sem áttu lögheimili í Grindavík fyrir rýmingu 10. nóvember 2023 val um að kjósa í Grindavík eða í því sveitarfélagi sem þeir eiga nú lögheimili í. Mikilvægt skref í átt að endurreisn bæjarfélagsins Síðastliðið haust settu stjórnvöld af stað opið samráðsferli um næstu skref í endurreisn Grindavíkur. Grindavíkurnefnd hafði vikurnar þar á undan unnið að gerð umræðuskjals um sveitarstjórnarkosningar, stjórnskipulag og samráð í endurreisnarferli bæjarfélagsins. Umsagnarferlinu lauk í lok október og birti dómsmálaráðuneytið í desember áform um lagasetningu vegna sveitarstjórnarkosninga í Grindavík í maí næstkomandi. Árni Þór Sigurðsson, formaður Grindavíkurnefndarinnar, sagði í samtali við fréttastofu í desember að áformin væru í samræmi við það sem nefndin hafi lagt til við stjórnvöld. Að fá ákvæðið inn í lög væri mikilvægt skref í átt að endurreisn Grindavíkur. „Og þá viljum við gjarnan að þeir sem bjuggu í Grindavík og ekki síst þá þeir sem hafa í hyggju að flytja aftur geti tekið þátt í að móta framtíðina í gegnum sveitarstjórnarkosningarnar,“ sagði Árni. Í greinargerð sem fylgir frumvarpinu kemur fram að markmið lagasetningarinnar sé að tryggja þau grundvallarréttindi fólks að geta notið kosningarréttar, sem sé liður í því að verja og endurreisa samfélagið í Grindavíkurbæ. Vegna náttúruhamfaranna sé nauðsynlegt að útfæra sérákvæði um kosningarrétt og kjörgengi þannig að Grindvíkingar geti komið að endurreisn samfélagsins þrátt fyrir að hafa þurft að flytja úr sveitarfélaginu. Í byrjun árs voru 1246 manns með skráð lögheimili í bænum, en voru 3.720 í lok september 2023.