Þingmenn í umhverfis- og samgöngunefnd vilja fá samgönguráðherra sem fyrst á fund nefndarinnar til að skýra forgangsröðun í jarðgangaframkvæmdum á næstu árum. Fljótagöng eru fremst á listanum en óvíst er hvenær framkvæmdir geti hafist. Eyjólfur Ármannsson samgönguráðherra hefur sagt að það verði í byrjun næsta árs. Forseti sveitarstjórnar Múlaþings hefur sakað ráðherrann um að svína á Austurlandi og hvetur nefndina Umhverfis- og samgöngunefnd til að láta endurreikna arðsemi Fjarðarheiðarganga enda hafi hún verið grunnforsenda þess að slá göngin af. Verkfræðingur og lögfræðingur rýndu arðsemisskýrslu og telja aðferðir rangar Arðsemisútreikningar vógu þungt þegar innviðaráðherra kynnti að Fjarðarheiðargöng yrðu ekki áfram næst í röðinni. Mjóafjarðargöng ættu frekar að rjúfa vetrareinangrun Seyðisfjarðar en byrja ætti á Fljótagöngum. Umhverfis- og samgöngunefnd Alþingis fer nú yfir umsagnir meðal annars frá Jóni Jónssyni lögfræðingi og Garðari Erni Garðarssyni verkfræðingi. Þeir véfengja arðsemisútreikningana í skýrslunni sem liggur til grundvallar. Þeir fullyrða að stytting með Fjarðarheiðargöngum sé vanmetin enda sé heiðin seinfarin með mörgum kröppum beygjum. Raungögn frá Goggle maps um ferðatíma yfir Fjarðarheiði skili styttingu um rúmar tíu mínútur en ekki rúmar sex, eða fjórar aukamínútur í styttingu. Hér má lesa umsögnina á vef Alþingis. Ekki ætti að reikna greiðsluvilja út frá uppsöfnuðum lokunardögum Þeir benda einnig á að aðferð við ófærðarútreikninga komi illa niður á Fjarðarheiðargöngum. Rangt sé að safna lokunum saman í heila sólarhringa. Frekar ætti að telja lokunartilvik því slíka daga, þegar hætta sé á ófærð, sé greiðsluvilji mun meiri. Lokunartilvik hafi verið 29-57 daga á ári á viðmiðunartímabili en uppsafnaðir lokunardagar aðeins ellefu að meðaltali. Í eldri skýrslum hafi RHA metið greiðsluvilja vetrarumferðar á fjallvegum 50% hærri en annarrar umferðar en aðferðin nú með uppsöfnun á lokunardögum leiði bara til 5,5% aukningar greiðsluvilja að vetri eða janúar, febrúar, mars og desember. Þessi vinnubrögð lækki áætlaðan greiðsluvilja í Fjarðarheiðargöngum niður í aðeins rúmar 900 krónur sem þeir telja allt of lágt. Greiðsluvilji í Mjóafjarðargöng sé reiknaður rúmar 3000 krónur. Aðferðin valdi því að arðsemi Fjarðarheiðarganga sé vanmetin. Þá sé árleg umferðaraukning um Fljótagöng áætluð 2% á ári í skýrslu RHA frá 2023 en aðeins eitt prósent um Fjarðarheiðargöng og Mjóafjarðargöng í skýrslu RHA frá 2025. Þetta gefi Fljótagöngum forskot í arðsemisútreikningum og fleiri þættir geri arðsemina ósamanburðarhæfa. Margir bíða eftir viðbrögðum þingnefndar Jónína Brynjólfsdóttir, forseti sveitarstjórnar Múlaþings, telur ástæðu til að staldra við og endurmeta forgangsröðun jarðganga. „Ég held að það sé einsýnt og biðla til umhverfis- og samgöngunefndar Alþingis að taka til skoðunar og endurskoðunar þær forsendur sem liggja að baki þessum arðsemisútreikningi. Til þess að vera þess fullviss að þarna hafi réttar forsendur legið til grundvallar þessarar stóru ákvörðunar,“ segir Jónína. Önnur ástæða til að endurmeta þetta séu nýjar upplýsingar frá Vegagerðinni um milljarðakostnað við öryggisúrbætur og breikkun á veginum yfir Fjarðarheiði til að hann uppfylli kröfur.