Rótin, félag um málefni fólks með fíknivanda, hefur sent áskorun til heilbrigðisráðherra um að falla frá komugjöldum í viðhaldsmeðferð við ópíóðafíkn hjá SÁÁ á Vogi. „Við erum að sjá og heyra að fólk er að detta út úr þessari meðferð út af því að það þarf að greiða komugjöld fyrir meðferðina,“ segir Kristín I. Pálsdóttir, framkvæmdastýra Rótarinnar. „Við teljum að það sé afskaplega óheppilegt og ekki í samræmi við svona lágþröskulda þjónustu og skaðaminnkandi þjónustu,“ bætir Kristín við. Hún segir að fólk borgi 17 þúsund krónur fyrir komu og læknisviðtal. Önnur Evrópulönd, Noregur, Finnland og Bretland hafi minnkað eða fellt niður kostnað við meðferð við ópíóðafíkn og niðurstaðan sé að brotthvarf úr meðferðinni minnki. „Markmiðið hlýtur alltaf að vera að halda fólki í meðferðinni og gera allt til þess. Þetta er ekkert rosalega stór hópur þannig þetta er ekki gríðarlegur kostnaður fyrir kerfið en rosalega mikilvægt fyrir þennan litla hóp,“ segir Kristín. Lágþröskuldaþjónusta miði að því að vera eins aðgengileg og hægt er, Sjúkrahúsið Vogur er staðsett á Stórhöfða 45 í Reykjavík. „Vorteymi Reykjavíkurborgar, vettvangsteymið fyrir fólk sem er heimilislaust eða með flókinn eða margþættan vanda – það er upptekið eiginlega tvo daga í viku við að koma fólki upp á Vog og það er rosalega léleg nýting á þeirri þjónustu,“ segir hún. Í áskorun Rótarinnar til heilbrigðisráðherra er lagt til að þjónusta sem nú þegar er í boði á göngudeild geð- og fíknisjúkdóma á Landspítalanum verði útvíkkuð fyrir stærri hóp. „Hvatning til að skoða úrræðin, hvaða þröskuldar eru og hvernig er hægt að losna við þá,“ segir hún.